بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ راجانی سنت ءِ گزرانکی ، چاگردی ءُ ربیدگی اگبالانی پتر ( سی ای ایس سی آر ) ءَ پاکستان ءِ دومی بر ءَ چار ءُ ٹپاس ءِ درگت ءَ برجم داشتگیں نیاد ءَ بلوچستان ءَ مردمی اگبالانی مزنیں لگتمالیانی نیمگ ءَ پتر ءِ باسکانی دلگوش گْور کنائینتگ۔ آئی ءَ لوٹ کرتگ کہ پتر پاکستان ءَ میان استمانی ڈبوانی پیلو نہ کنگ ءِ سر ءَ جست بہ کنت ۔ آئی ءَ راجانی سنت ءِ سر ءَ زور داتگ کہ آ بلوچستان ءَ مردمی اگبالانی لگتمالیانی پٹ ءُ پول ءُ چارگ ءَ، دلجم ءُ مدامی دلگوش بیوکیں کار ڈولے بہ ٹاھین ایت ءُ انچیں جاھے بہ بیت کہ آ اود ءَ بلوچانی توار گوش دارگ بہ بیت۔
ڈاکٹر نسیم ءَ گوں پتر ءِ باسک مائیکل ونڈفور ءُ جولیٹا روسی ءَ گند ءُ نند کرتگ۔ آئی ءَ آیانی دلگوش زور بیگواھی ، در آمیدگسی کوش ، مچانکی ملام ءُ بلوچانی بنکی گزرانکی ، چاگردی ءُ ربیدگی اگبالاں پلگ ءِ نیمگ ءَ گْور کنائینتگ۔ آئی ءَ گْوشتگ کہ اے جاور پاکستان ءِ بلوچ راج ءِ سر ءَ تْرامیں زوراکیاں گستا کنگ ءُ چارگی نہ اَنت۔
زور بیگواھی ءُ مچانکی ملام ءِ بارہ ءَ سرپدی دیان آئی ءَ گْوشتگ کہ ھزاراں بلوچ کھول اے آزار ءَ گْْوزگ ءَ اَنت ءُ ایشی ءِ بد ءُ بیرانیں سان تیوک ءَ ھما مردمانی سر ءَ نہ اَنت کہ زور بیگواہ اَنت۔ کھول چہ وتی والینوکاں زبھر بہ اَنت ، چک چہ وانگ ءِ آسراتی ءُ سرجمیں کھول نیزگاری ءُ بزگی ءِ وڈالان اَنت۔
آئی ءَ ڈاکٹر ماہ رنگ ءُ بلوچ یکجھتی پتر ( بی وائی سی ) ءِ دگہ راھشونانی پجیگ ءَ بلوچ مردمی اگبالانی کارکنانی زندانی بیگ ءِ سر ءَ ھم بے تاھیری درشان کرتگ۔ آئی ءَ ایمان مزاری ءُ آئی ءِ لوگواجہ ھادی علی چٹا ءَ دیگ بیتگیں سزا ءِ درور دیان ءَ گْوشتگ کہ چہ ایشی ءَ سھرا اِنت کہ پہ بلوچ اگبالاں توار چست کنوکیں پرایمنیں مردم چون گوں ترندی ءَ ملام کنگ بہ اَنت۔
گزرانکی ، چاگردی ءُ ربیدگی اگبالانی میان استمانی پیمان ( آئی سی ای ایس سی آر ) ءِ 1 می بند ءِ درور دیان ءَ ڈاکٹر نسیم ءَ پتر تْرانگ ءَ پرینتگ کہ درسیں راجاں وتواجھی ءِ اگبال ھست ، کہ آئی ءِ تہ ءَ وتی زمین چیر ءِ مڈی ءُ گنجانی وتواکویں رنگے ءَ کارمند کنگ ءِ اگبال ھم ھوار اِنت۔ آئی ءَ 11 ، 12 ءُ 13 می بندانی ھم گپ جتگ اَنت کہ شریں زند ، جاندْراھی ءُ وانگ ءِ اگبالانی پانکجنی کن اَنت۔
پاکستان ءِ نیمگ ءَ اے بندانی پاسداری ءِ گپ ءِ سر ءَ جست ایر کنان آئی ءَ گْوشتگ : ’’ وھدے کہ بلوچستان ءَ اے اگبال پلگ بیگ ءَ اَنت ، پاکستان چون اے گپ ءَ جت کنت کہ آ وتی زمہ واریانی پاسداری کنگ ءَ اِنت ؟ ‘‘
گوں پتر ءِ باسکاں گپ جنان ءَ آئی ءَ سھرا کرتگ : ’’ ما ھمدردی ءِ دزبندی نہ کنگ ءَ ایں۔ ما مزدانک ، جست ءُ پرس ءُ وتی بنکی اگبالانی لوٹ کنگ ءَ ایں۔ ‘‘
ڈاکٹر نسیم ءَ پتر ءِ راھبندی چار ءُ ٹپاس ءِ نیاد ءَ ھم بھر زرتگ ، کہ آئی ءِ تہ ءَ پاکستان ءِ نزیک ء 12 کسی بولکے ءَ پیمان ءِ سر ءَ کاربند بیگ ءِ جستانی پسو دیگ ءَ اتگ اَت۔ نیاد ءِ تہ ءَ جولیٹا روسی ءَ باز بر ءَ بلوچستان ءِ جاور ءِ سر ءَ جست ایر کرتگ ، مائیکل ونڈفور ءَ ھم دمگ ءِ جیڑہ سھرا کرتگ اَنت۔ گْور اے جستاں بلوچستان ءِ ویل پاکستان ءِ کارکردانی چار ءُ ٹپاس ءِ بھرے بوت۔
نیاد ءِ گڈسر ءَ ڈاکٹر نسیم ءَ پتر ءِ سرکماش ءُ باسک ایل۔ ای۔ پیریز ءُ فیوریو ویسکن ءَ دگہ کراچ ھم داتگ ، کہ آیانی تہ ءَ بلوچستان ءَ مردمی اگبالانی لگتمالی ءِ بارہ ءَ نبشتہ اَت۔
فیوریو ویسکن ءَ اے کراچانی سر ءَ وتی گچینی دلگوش پیش داشتگ۔ آئی ءَ اے کراچ شریں وڑے ءَ چار اتگ ءُ ھما بنگپ کہ آیانی سر ءَ پتر ءَ گپ جنگ ءُ جست کنگ ءِ واک ھست نشان جتگ اَنت ءُ ڈاکٹر نسیم ءَ باور کنائینتگ کہ آ دیم تر ءِ نیاد ءَ اے جیڑھانی سر ءَ گپ جنت۔
