بلوچ راجی زْرمبشت ( بی این ایم ) ءَ نیدرلینڈز ءِ شھر دی ھیگ ءَ پارلیمان ءِ دیم ءَ راشد احمد پنام فدا ءِ ڈیھ ءَ درکنگ ءِ سر ءَ زھرشانی روانکے کش اتگ۔ زھرشانی کنوکاں چہ ڈچ واکداراں لوٹ کرتگ کہ راشد ءِ ڈیھ ءَ در کنگ ءِ شور زیت چارگ ءُ ایشی ءِ دیم گرگ بہ بیت۔ اے زھرشانی ءِ مول راشد احمد ءِ ڈیھ ءَ درکنگ ءِ جاورانی نیمگ ءَ ڈچ واکدار ، مردمی اگبالانی تْرامگیج ءُ میان راج ءِ دلگوش گْور کنائینگ اَت۔
روانک ءَ جمال ، محمد مھیم ، سنی ءُ سیف عبید ءَ گپ جتگ۔ گپ جنوکاں اے جیڑہ ءِ سنگینی ءِ سر ءَ زور داتگ ءُ گْوشتگ کہ اے نادلگوش کنگی جیڑھے نہ اِنت۔ آیاں چہ نیدرلینڈز ءَ لوٹ کرتگ کہ آ ڈیھ ءَ درکنگ ءِ شورانی تہ ءَ مردمی اگبالانی بارہ ءَ وتی ڈبوانی پاسداری بہ کنت ، ءُ گْوشتگ کہ اے رنگیں شورانی تہ ءَ مردمانی سر ءُ ساہ ءِ پھریزگ المی اِنت۔
روانک ءِ میان ءَ بی این ایم ءَ نیدرلینڈز ءِ باھوٹ ءُ لڈ اتگیں مردمانی تک ءِ کارانی وزیر ، بارٹ فان ڈین برنک ءَ نمدی ھم داتگ۔ نمدی ءِ تہ ءَ چہ ڈچ سرکار ءَ لوٹ کنگ بیتگ کہ آ راشد احمد پنام فدا ءِ جیڑہ ءَ زیت چار ءُ ٹپاس بہ کنت ءُ دلجم بہ کنت کہ آئی ءِ ساہ ءُ بنکی اگبالانی پھریز شریں وڑے ءَ ارزشت دیگ بہ بیت۔
