چہ زورگریں پاکستان ءِ نیمگ ءَ ماں بلوچ سرڈگار ءَ ایٹمی تراک ءِ چکاس بلوچستان ءِ سر ءَ زورگری ءُ زیردستی ءِ چیدگ اَنت۔اے تراکانی پد ءَ زمین ءِ چیر ءِ آپ زھری بیتگ اَنت ءُ اگواز ( ماحولیات ) گھ اتگ۔ اے گپ تْرانکاراں 28 مئی ’ سیاھیں روچ ‘ ءِ مراگش ءَ جتگ اَنت۔اے مراگش بی این ایم ءِ شھمیر راشد ( آواران ) ھنکین ءَ برجم داشتگ۔
آیاں گْوشتگ 28 مئی 1998 ءَ پاکستان ءَ بلوچستان ءِ چہ آپ ، ابرمی کاھچر ءُ زند ءَ سرچکاریں دمگ چاغی ءَ ایٹمی تْراک کرت۔چہ ایشی ءَ مردم چہ وتی لوگاں لڈگ ءَ ناچار بوت اَنت ، تابکاری ءِ پد ءَ اگواز ءَ بھ پُر نہ بیوکیں تاوان رس اِت۔
گْوشتانک دیوکاں گْوشتگ پہ ایٹمی تْراکاں پاکستان ءَ پہ زانت بلوچستان گچینت ، پرچا کہ آ ایشی ءَ زورگپتیں دمگے زانت۔ پہ پاکستان ءَ اد ءِ جاھمنندانی زنداں ھچ ارزشت نیست۔چہ اے تْراکاں مزنیں دمگے ءَ پوست ءِ شیمک ءِ پجیگ ءَ وڑ وڑیں نادْراھی تالان بوت۔اے بارہ ءَ دستاویز ھم ھست اَنت کہ دمگی ءُ میان راجی تک ءَ ڈالچار کنگ بیتگ اَنت۔
’’ پہ پاکستان ءَ بلوچانی جان ءُ مڈیاں ھچ ارزشت نیست۔اد ءَ ھم روچ چہ نا انجاریں دگ ءُ چارگزرانی نادلگوشی ءَ دھاں مردم بیران بیگ ءَ اِنت۔ دگہ نیمگے پاکستانی لشکر وت ھم مردماں زوربیگواھی ءُ درآمیدگسی کوشانی نشانگ کنگ ءَ اِنت۔اے بلوچ راج ءِ چکچینی ءِ دْرچ اِنت۔چاغی ءَ پاکستانی لشکر ءِ ایٹمی چکاس بلوچ راج ءَ ھمک تک ءَ تباہ کنگ ءِ شونداتانی بھر اِںت۔‘‘
بی این ایم ءَ ماں اے مراگش ءَ گْوشتتگ کہ بلوچ راج پاکستانی مھترھند ءِ چپگان ءَ 28 مئی ءَ سیاھیں روچ ءِ بستار ءَ یات کنت۔
اے مراگش ءَ بی این ایم آواران ھنکین ءِ سرکماش استاد مھران ، کمک سرکماش تلار ناز ، سرباز وفا ءُ ودار ءَ گپ جتگ ءُ جارچینی ھنکین ءِ کلیتدار میرک ءَ کرتگ۔
زانگ بہ بیت کہ بلوچ راجی زْرمبشت ( بی این ایم ) ھمک سال 28 مئی ءَ ماں سرجمیں جھان ءَ ’ سیاھیں روچ ‘ ءِ نام ءَ مراگش ءُ نیاد کنت۔اے روچ ءَ ماں بلوچستان ءَ چہ پاکستان ءِ نیمگ ءَ بیتگیں ایٹمی چکاسانی پد ءَ ودی بیوکیں تابکاری سانانی بارہ ءَ مردماں سرپدی دیگ بیت ءُ زھرشانی ءُ مراگشانی پارست ءَ ایٹمی سلاھانی بگیری ءَ بلوچ راج ءِ دید درشانگ بیت۔بی این ایم لوٹ کنت کہ پاکستان ءِ ایٹمی سلاہ میان راجی تْرامگیجانی چیردستی ءَ ناکارگ کنگ بہ بی اَنت۔پرچا کہ اے پہ دمگ ءُ جھان ءَ یکشل ءَ برجاھیں ترسے۔
