بلوچ راجی زْرمبشت ( بی این ایم ) ءَ جرمنی ءِ شھر کیمنٹز ءَ زورگپتیں بلوچستان ءَ مردمی اگبالانی بگیریانی سر ءَ زھرشانی کرتگ۔ اے زھرشانی ءَ ماں بلوچستان ءَ پاکستان ءِ لشکر ءِ مچکی ڈنڈ ءِ شوندات سھرا کنگ بیتگ ءُ اے نیمگ ءَ میان راج ءِ دلگوش گْور کنگ بیتگ۔
گپ جنوکاں گْوشتگ بلوچستان ءَ ھزاراں کھول پاکستانی لشکر ءِ مچکی ڈنڈ ءِ شونداتانی آماچ اِنت۔ ھمے رد ءَ سیاسی کارکن ءُ پہ مردمی اگبالاں توار چست کنوکاںی کھول ءُ نزیکیں سیاد نشانگ کنگ بیگ ءَ اَنت ۔
آیاں گْوشتگ بلوچ راجی زْرمبشت ( بی این ایم ) ءِ باز کلانھیں راھشون گوں ڈاکٹر دین محمد ، غفور، اقبال ، محمد رمضان ، حاصل حسرت، شاہ نواز ءُ نودربر راھشون ذاکر مجید ، زاھد ، شبیر ، اسد ءُ دگراں چہ دھکاں گیش اِنت کہ پاکستانی لشکر ءِ چیریں آزار جاھاں بند ءُ زور بیگواھی ءِ آماچ اَنت ۔
تْرانکاراں ڈاکٹر ماہ رنگ ءُ صبغت اللہ ءِ یکشلیں زندان بیگ ءُ زندبندیگی ءِ سزا ءِ سر ءَ بے تاھیری درشانتگ ءُ گْوشتگ بلوچستان ءَ ھما کس زور بیگواھیانی آماچ کنگ بیگ ءَ اَنت کہ پہ وتی بنکی اگبال ءُ آجوئیاں توار چست کن اَنت۔
اے زھرشانی ءَ بی این ایم جرمنی تک ءِ کمک کارگشاد جلال ، کیمنٹز بنزہ ءِ کمک کارگشاد فیصل ، اسد زاھد ءُ حرابانو ءَ گپ جتگ۔