بلوچ راجی زْرمبشت ( بی این ایم ) ءِ مردمی اگبالانی تْرامگیج پانک ءَ وتی نوکیں گزارش ءَ پدر کرتگ کہ 11 ءُ 12 جولائی 2026 ءَ گوادر ھنکین ءِ ھند پسنی ءِ دمگ شادی کور ءِ نزیک سرجمیں نندوک بزاں کہ نزیک 5 ھزار مردم چہ وتی پت ءُ پیرکی ھنکین ءَ پہ زور در کنگ بیتگ اَنت۔
گزارش ءِ رد ءَ لشکرکشی ، زور بیگواھی ، مزنیں کچے ءَ دزگیری ، بنکی آسراتیانی گپت ءُ گیر ءِ سر ءَ پابندی ءُ پاکستانی لشکر ءِ تچکیں پرمان ءِ پد ءَ مردم چہ وتی ھند ءَ لڈینگ بیتگ اَنت ۔ 9 ءُ 10 جولائی ءَ پاکستانی لشکر ءِ کارمنداں مردماں گْوشتگ کہ وتی گساں یلہ بہ دے اَنت ءُ مردم ڈاہ داتگ اَنت کہ اگاں آیاں لڈگ ءِ گپ نہ من اِت ءُ انگت نشت اَنت گڑا آیانی گس سوچگ بہ اَنت۔
لشکرکشی ءُ مردمی اگبالانی بگیری
پانک ءِ رد ءَ 5 مئی 2026 ءَ پاکستانی لشکر ءُ گوں آئی ءَ ھم گْرنچیں چیریں واکانی کارمنداں 85 ءَ بہ گر داں 100 ءِ میان ءَ مردم دزگیر کرتگ۔ آزار داتگ اَنت ، روچ ءِ سر ءَ اوشتارینتگ اَنت ءُ کسے ءَ کہ ککار ءُ چیواہ کرتگ آیانی دپ ءَ ڈوک مان کرتگ۔ نزیک ء 40 دزگیریں مردم شادی کور ڈیم ء کش ءَ لشکر ءِ بندر ءَ برگ ءُ زور بیگواہ کنگ بیتگ اَنت ، کہ آیانی تہ ءَ باز داں انیگ ءَ ھم آیانی زندان ءَ زور بیگواہ اَنت۔
گزارش ءَ گْوشگ بیتگ کہ 5 داں 8 مئی ءَ سئے روچاں ٹپ ماں ٹپ لشکری انگر ءِ تہ ءَ شادی کور ، زرین کور ، تراتی ، گورستانی ءُ کبادی ءَ آیگ ءُ روگ ءَ پابندی اَت۔ اے میان ءَ چہ نادْراھجاہ ءَ واتر بیوکیں جنین ءُ چکاں ھوار 8 کس دو روچ ءَ بے میار ءَ زندان کنگ بیتگ۔ مئی ءُ جون ءِ میان ءَ چہ گبدی ءِ لشکری پانگس ءَ مردمانی وراک ءُ وردن ءُ لوگ ءِ کارمردی چیز دارگ بیتگ اَنت ءُ مردماں گْوشتگ اش کہ وراک ءُ وردن ءُ بنکی کارمردی چیزاں وتی میتگاں مہ بر اِت۔
گزارش ءَ سردل ء شیر خان ءِ بارہ ءَ ھم نبیسگ بیتگ ، کہ آ 22 نومبر 2025 ءَ لشکر ءِ چیریں واکاں زور بیگواہ کرتگ اَت۔ آئی ءِ ٹپ ءُ ٹوریں کنٹ 30 مئی 2026 ءَ پسنی ءِ نزیک ءَ دست کپتگ۔
مردمی ءُ ربیدگی سان
پانک ءِ رد ءَ درانڈیھ بیتگیں کھول پسنی ، ھورماڑا ، تربت ءُ نزیکیں شھراں پہ ناچاری لڈ اِتگ اَنت ،چہ آیاں بازیں مردم گدانی تہ ءَ زند گْوازینگ ءَ اَنت۔ نزیک ء 10 ھزار ایکڑ ءِ ڈگار ویران بیتگ اَنت ، چر ایشی ءَ کشت ءُ کار ، ورگ ، وانگ ، جاندْراھی ءُ روزگاراں سکا تاوان بیگ ءَ اِنت۔ گزارش ءِ رد ءَ چہ اے زوریں لڈ ءُ بار ءَ مردمانی گوں وتی پت ءُ پیرکی ھند ءُ ڈگار ءَ ھم گْرنچی ،گْوستانکی پجار ءِ پشت ماں پشت سر بیگ ترس ءِ دیمپان کرتگ اَنت۔
زوراکی ءِ دْراجیں دْرچ
پانک ءَ 2025 ءَ 1,355 زور بیگواہ ءُ 225 در آمیدگسی کوش پیت بند کرتگ۔ چہ جنوری ءَ بہ گر داں جون 2026 ءَ 556 زور بیگواہ ءُ 227 در آمیدگسی یا دزگیری جاہ ءَ کشگ بیتگ۔ تْرامگیج ءِ رد ءَ اکتوبر 2026 ءَ کلات ءِ دمگ شور پارود ءَ ھم نزیک 30 ھزار مردم چہ گساں در کنگ ءِ پرمان دیگ بیتگ۔
میان راجی راھبند ، زمہ واری ءُ لوٹ
گزارش ءِ رد ءَ گْوشگ بیتگیں اگبالانی لگتمالی شھرمنندی ءُ سیاسی اگبالانی میان راجی پیمان ( آئی سی سی پی آر ) ، گزرانکی ، چاگردی ءُ ربیدگی اگبالانی پیمان ( آئی سی ای ایس سی آر ) ، آزار ءِ بگیری ءَ کنونشن ، ڈیھ ءِ تہ ءَ در پہ در کنگ ءِ بارہ ءَ راجانی سنت ءِ راھشونیں راھبند ءُ بومی ئیں مردمانی اگبالانی بارہ ءَ راجانی سنت ءِ جارینک ءِ 10 می بند ءِ رد ءَ سکا بے تاھیری ءِ الام اَنت۔
پانک ءَ لوٹ کرتگ کہ پہ زور در کنگ زیت ءَ آسر کنگ بہ بیت ، زور بیگواھیں مردمانی جاہ پدر کنگ بہ بہ اَنت ، آزاتیں رنگے ءَ پٹ ءُ پول ءِ مانزمان دیگ بہ بیت ، مردمی کمک رسینگ بہ بیت۔ آئی ءَ مردمانی دلجم ءُ مڑاہ داریں واتری ءِ مانزمانی لوٹ اتگ۔