بلوچ راجی زْرمبشت ( بی این ایم ) ءِ جارکش ءَ اسلام آباد ءَ 12 ءُ 13 نومبر ءَ برجم دارگ بیوکیں پاکستان منرلز انویسٹمنٹ فورم ( PMIF26 ) ءِ سر ءَ سکا بے تاھیری درشان کنان ءَ گْوشتگ کہ پاکستان جھانی سرمایہ کار ءُ باز راجی شرکتانی پارست ءَ بلوچستان ءِ زمین چیری مڈیانی لٹ ءُ پل ءَ میان راجی گزرانکی کارشونے پیش دارگ لوٹ ایت۔ سرمایہ کاری ءُ دیمروئی ءِ نام ءَ برجم دارگ بیوکیں اے پتر راستی ءَ ، بلوچ راج ءَ چہ آئی ءِ مڈیاں زبھر کنگ ءُ مدامی نیزگار، پدمنتگ ءُ گزرانکی ایردست دارگ ءِ کوشستے۔ ما ایشی ءَ زمین چیری مڈیانی رد ءَ ساز اتگیں نوک آبادی تْرام گْوش ایں ، کہ چہ ایشی ءَ مڈیانی سیت درآمداں رس اَنت ءُ ھمے سرڈگار ءِ نندوک لٹ ءُ پل ءُ زبھری ءِ آماچ بہ اَنت۔
جارکش ءَ گْوشتگ کہ بلوچستان ءَ ھرچ وڑیں دری سرمایہ کاری ، زمین چیری مڈیانی در کنگ ءِ کارشون یا ابرمی مڈیانی در روپگ ءُ برگ ، بلوچ راج ءِ وتواک، راست ءُ الباریں واھگ ءَ ابید منگ نہ بیت۔ بلوچ راج ءِ واھگ ءُ سیاسی بستار ءَ ڈالچار کنگ ءُ بیتگیں چوشیں پیمان اڑ اَنت کہ منگ نہ بہ اَنت۔اے رنگیں سوڑگ ءُ کارشون بلوچستان ءَ برجاھیں جیڑہ ءَ چد ءُ گیش تر کنت ءُ کشت ءُ کوش ءِ گیش کنگ ءِ نیمون بیت۔ ما چہ سجھیں زمین چیری مڈیانی کوچوک ءُ کارمرد کنوکیں میان راجی شرکت ، سرمایہ کار ءُ گزرانکی تْرامگیجاں دزبندی کن ایں کہ آ ماں بلوچستان ءَ سرمایہ کاری ءَ پد بہ کنز اَنت۔ بلوچستان زورگپتیں سرڈگارے کہ جنگی جاورے ءِ تہ ءَ اِنت ، اد ءَ میان راج ءِ کردانکی ءُ سیاسی ڈبو اِنت کہ آ زورگریں مھترھند ءِ گزرانکی سیتانی ھمراہ بیگ ءِ جاہ ءَ بلوچ راج ءِ وتواجھی ءُ آجوئی ءِ جھد ءِ پلہ مرزی بہ کنت۔
آئی ءَ چد ءُ دیم گْوشتگ کہ بلوچستان ءَ برجاھیں زور بیگواھی ، در آمیدگسی کوش ، سیاسی کارکن ءُ راھشونانی ناراھیں دزگیری ، سیاسی تواراں گوں دروگیں بھتاماں پابندی جنگ ءِ کوشست ءُ بلوچ راج ءِ سیاسی ءُ گزرانکی اگبالانی پلگ ، آئی ءِ زمین چیری مڈیانی سر ءَ زورگری ءِ برجاہ دارگ ءِ مزنیں تْرامے ءِ بھر اَنت۔ بلوچ راج چہ دھکاں وتی سرڈگار ، راجی ھستی ءُ پہ وتی مڈیانی وت مستری ءَ جھد ءَ اِنت۔ اے جھد ءِ تہ ءَ مردین ، جنین ءُ ورناھانی یکشلیں دیمونی اے جھد ءِ بھا اَنت۔ اے ویلاں ڈالچار کنگ ءُ بلوچستان ءَ دیمروئی ءُ گھبود ءِ گپ ءِ جنگ مردماں رد دیگ اِنت۔ میان راجی شرکت اے گپ ءَ شر سرپد بہ بہ اَنت کہ چہ بلوچ راج ءِ واھگ ءَ ابید چہ بلوچستان ءِ مڈیاں سیتمند بیگ ،آیاں اڑے ءِ تہ ءَ دور دنت ءُ لٹ ءُ پل کنوکیں کردے ءِ رنگ ءَ پیش دار ایت۔
بلوچ راجی زْرمبشت ءِ جارکش ءَ راجانی سنت ، جھانی گزرانکی تْرامگیج ءُ چہ میان راج ءَ لوٹ کرتگ کہ آ بلوچستان ءِ ابرمی مڈیانی بارہ ءَ ھرچ کارشونے ءَ بلوچ راج ءِ آزادیں واھگ ءَ بنکی ڈک ءِ وڑ ءَ بہ من اَنت ، مردمی اگبالانی بگیریانی سر ءَ دلگوش گْور بہ کن اَنت ءُ بلوچ راج ءِ سیاسی ءُ راجی اگبالانی منگہ ءَ بہ کن اَنت۔ آئی ءَ سھرا کرتگ کہ بلوچستان ءِ سرڈگار زمین چیری مڈیانی رد ءَ زانگ بیوکیں نوک آبادی یے نہ اِنت بلکیں بلوچ راج ءِ ماتیں سرڈگارے ، ءُ ایشی ءِ مڈیانی بارہ ءَ شور کنگ ءِ اگبال بلوچ راج ئیگ اِنت ، زورگریں مھترھندے ءِ یا آئی ءِ جھانی ھم دستانی نہ اِنت۔ بلوچ راج ءِ واھگ ءِ بگیری ءَ درسیں کارشون لٹ ءُ پل ، گھگیری ءُ چد ءُ گیش تر ناپاداری ودی کن اَنت۔ بلوچستان ءَ راستیں ایمنی ، دیمروئی ءُ گھبود ءِ راہ چہ بلوچ راج ءِ آجوئی ، وت واجھی ءُ وتی مڈیانی سرجمیں واکداری ءِ کشکاں جز ایت۔