دو شمبے، 13 جولائی، 2026 | جارکش بی این ایم
بلوچ راجی زْرمبشت ( بی این ایم) ءِ جارکش ءَ گوادر ھنکین ءِ ھند جیمڑی ءِ جاورانی سر ءَ سکا بے تاھیری درشان کنان ءَ گْوشتگ ھپتگے ءَ برز اِنت کہ جیمڑی پاکستانی لشکر ءَ سرجم ءَ انگر کرتگ۔ اے ھند ءِ بنجاھی بازار جیمڑی ءِ پجیگ ءَ کش ءُ گْور ءِ میتگاں درمان ءُ ورگی چیزانی کمی بیتگ۔انیگیں روچاں پاکستانی لشکر ءَ پنچ کس زندانی جاہ ءَ کشتگ، 60 ءَ گیش زور بیگواہ کرتگ، پانوان ءِ بازیں لوگ پروشتگ ءُ سدانی مردم پہ لڈ ءُ بار ءَ ناچار کرتگ۔بلوچ سرمچارانی ارشاں نیمون کنگ ءُ پاکستان لشکر تچکے ءَ شھرمننداں نشانگ کنگ ءَ اِنت۔ شھرمنندانی بنکی اگبال پچ گرگ ءُ تر ءُ گرد ءِ آجوئی پلگ بیتگ۔
جارکش ءَ گْوشتگ جیمڑی ءُ آئی ءِ کش ءُ کر ءِ ھلکانی زمین ٹکی ارزشت ءِ پد ءَ پاکستانی لشکر اد ءِ نندوکیں مردماں چہ اد ءَ در کنگ لوٹ ایت
آئی ءَ گْوشتگ کہ دمگ ءَ میان راجی ءُ دمگی واک پہ وتی سیتاں گر ءُ چیل اَنت چہ ایشی ءَ جیمڑی ءِ زمین ٹکی ارزشت چد ءُ گیش بیتگ ۔گْوست ءَ زورگراں اے دمگ پہ وتی بالی ءُ زری جنگاں پر ارزشتیں بندرے ءِ وڑ ءَ کارمرد کرت، مروچیگیں دمگی چست ءُ ایرانی پژدر ءَ اے دمگ یک برے پد ءَ سکا پر ارزشت اِنت۔
جارکش ءَ گْوشتگ بلوچ راج چوش سرپد مہ بیت کہ پاکستانی لشکر جنگے ءِ پدگوانک ءَ اے کاراں کنگ ءَ اِنت بلکیں اے تْرام اتگیں شونداتے ءِ بھر اَنت۔ انچوش کہ سی پیک دگ ءِ کش ءُ کرانی میتگ ایمنی ءِ برجاھی ءِ نام ءِ سر ءَ یکشلیں لشکرکشی، زور بیگواھی ءُ درآمیدگسی کوشانی پارست ءَ لڈ ءُ بار ءَ ناچار کنگ بیتگ اَنت، ھمے وڑ ءَ مروچی جیمڑی ءُ پانوان نشانگ کنگ بیگ ءَ اَنت۔
آئی ءَ چہ میان راج، راجانی سنت، یورپی سنت، دمگ ءِ ھمساھگیں ڈیھ ءُ مردمی اگبالانی میان راجی گلاں لوٹ کرتگ کہ آ پاکستان ءَ میان راجی راھبند ءُ مردمی اگبالانی پاسداری ءِ پابند کنگ ءَ سانمند گامگیج بہ زیر اَنت، داں زور گپتیں بلوچستان ءِ جاھمنندانی بنکی اگبالانی پھریزگ الم کنگ بہ بیت۔