بلوچ نیشنل موومنٹ نا ترجمان برطانیہ نا پارلیمنٹ ئٹی ، بلوچ نسل کشی نا خلاف مروکا لانگ مارچ نا حمایت ئٹ جان میکڈونل نا پیش کروکا قراردادءِ خوش آمدید پاریسا برطانیہ نا پارلمنٹیرین آتَن دائنا حمایت کننگ نا اُمیتءِ تِیخینا۔
نن جان میکڈونلڈ ، و دا قرارداد نا حمایت کروکا پاٹیک ، لیبر پاٹی ، اسکاٹش نیشنل پاٹی ، ڈیموکریٹک یونینسٹ پاٹی و برطانیہ نا کُل پارلیمنٹیرین آتا شکریہءِ ادا کینا ہموکہ انسانیت نا حق ئٹی تینا توارءِ چیست کرینءُ۔ دا برطانیہ نا مخلوک نا ھم وقار نا معاملہءِ انتیکہ ہوفتہ ٹیکس نا پیسہ غاتَن انسانیت نا خلاف جرم ئٹی ھوار مروکا ریاستءِ پاکستان نا کمک کننگیک۔
بیان ئٹی پاننگانءِ بلوچستان نا حالیت بلوچستان نا زی آ قوضہ کننگ نا وجہ اَن خراب مسونءُ۔ بلوچستانءِ کدرینگوکا 75 سال اَن غلامی نا زمزیر آتیٹی تَفِنگانءِ دا بد ترین انگاءَ غلامی اَن پیشن مننگ کِن عالمی توجُو و کمک نا سک زلورتءِ۔ داسہ وخت بسونءِ کہ بلوچ تحریک تون براہ راست مدت و کمک کننگءِ۔ امریکا ، برطانیہ ، یورپی یونین و اقوام متحدہ نا نمائندہ غاتَن اننا امیتءِ کہ ھو بلوچ نا حق آکِن ہوفتون سلِیر۔
ترجمان پارے جبرئٹ بیگواہیک و بغیرس عدالت سینا پاننگ اَن کسیفِنگ بلوچستان ئٹی بندغی حق آتا کُل اَن بللا خلاف ورزیءِ ولے داڑن پورا حالیت انگتہ پاش مفہک۔ بلوچستان نا زی آ مروکا زالمی نا اَسے بَلو فہرست و تاریخ اَسے۔ دائنا مشاہدہ و پٹ و پول کننگ اَن بیدس بلوچستان نا مسلئہ نا حل پیشن مننگ کپپک۔ بلوچ تینا قومی خود مختاری و تینا سر زمین نا زی آ پورا اختیار خوائیک۔
ھو پارے بلوچستان نا زی آ قوضہ کننگ اَن پد بلوچ آتَن کُل بنیاتی انگاءَ حق آتَن زِبار کننگانءِ اراڑن بلوچ قوم نا سماجی حالیت ئٹی باز کمی بسونءِ۔ اینو نا دور ئٹی ھم بلوچ آک قرونءِ وسطی نا ڈول ئٹ زندگی تدیفساءُ و ہوفتے ہر وڑئٹ پسماندہ تخنگانءِ۔ بلوچ قوم نا ترقی اَن مُر کننگ کِن ہوفتہ معیشتءِ تباہ کننگانءِ ، ہوفتہ وسائل آتے دُوزنگ ئٹیءُ ، سمندر ئٹی غیر قانودی انگاءَ ٹرالنگ آتے اَتِنگ اَن سمندری حیات نا نسل کشی مننگ ئٹیءِ ، وہوکا دریاتیں ڈیم جوڑ کننگ اَن زمین آتے خشک کننگانءِ ، داڑن زمین نا شیف ئنا دِیر ئٹی با کمی بسونءِ۔ اگہ بلوچستان نا زی آ پاکستان نا قوضہ موستی گڑاس پین سال برجا مَس تو بلوچستان ئٹی اَسے بَلو بندغی المیہ اَس ودی مریک اموڑن خطہ ٹی باز ہُورے اِسکان منفیءُ اثرات آک سلیرا۔
بی این ایم نا ترجمان پارے بلوچ تینا قومی آجوہی نا خاطر کِن پاکستان نا جبر و پوج کُشی اَن بیدس پر اَمن انگا جدوجُہد نا کَسرءِ اِلے تَنءِ ولے ریاستءِ پاکستان ہروخت چم بازی ئٹ پرایمن انگاءَ جدوجُہدءِ ختم کننگ نا کوشستءِ کرینءِ بلوچ سیاسی آ کارکن آتا زی آ ہر وڑنا زلم کرینءِ ۔بی این ایم نا وڑ انگاءَ پرایمنءَ سیاسی جماعت نا لیڈرآتَن الیس عام انگاءَ کارکن آتے سد آتا کچ ئٹ شہید کرینءِ ، بازنگاءَ کارکن آک اینو پہ دے اِسکان بیگواءُ۔ ننے بندغی حق آتا دا بد ترین انگاءَ حالیت اَن پیشن مننگ کِن عالمی برادری نا مدت و کمک نا زلورتءِ۔ چین ، سعودی عرب ، امارات و دنیا نا ایلو ملک آک بلوچستان نا دا حالیتءِ خنیرا ھو بائیدءِ بلوچستان ئٹی پاکستان نا حق ئٹی سرمایہ کاری و ہودے پوجی و مالی کمک تننگ اَن پاریز کیر۔
