بلوچ نیشنل موومنٹ (بی این ایم) نا چیئرمین ڈاکٹر نسیم بلوچ ورلڈ سندھی کانگریس نا 38 میکو سندھ انٹرنیشنل کانفرنس آن تران کرسہ پارے کہ بلوچ و سندھی قوم آتیکن قومی آجوئی، جمہوریت امن و پائیدار انگا مستقبل نا دوئی کننگ اسٹ ایلو تو سوگو او تعلقداری ئس تِخِک۔ انتئے کہ قومی آجوئی آن بیدس جمہوریت، امن و پائیدار انگا مستقبل بیرہ زیبا او لوز آتا و است ئے ریفوکو تغ جوڑ مریرہ۔
او پارے کہ او بلوچ نیشنل موومنٹ نا چیئرمین نا حیثیت ئٹ کانفرنس آن تران کننگ ءِ، ولے سندھ ئنا بندغ آتا نیام ئٹی مننگ آن دا احساس مفک کہ او پین قوم ئسینا نیام ئٹی سلوک ءِ۔ سندھ و بلوچستان بیرہ اِرا ہمسایہ او ڈغار افس بلکن سد آ سال آتیان ثقافتی، بندغی، کاروباری و سیاسی سیالی تیٹی گھنڈوک ءُ۔ دافتا سیم، تہذیبی آ یاد آک، تاریخی آ تجربہ آک و ساڑی آ وخت ئنا جیڑہ غاک تین پہ تین تو گھنڈوک ءُ۔
او پارے کہ اگہ قومی آجوئی پاش ءُ سیاسی جدوجہد، مستقل مزاجی و قربانی تیان بیدس دوئی کننگ مروس تو دنیا نا دیہاڑ ئٹی لکھ آتا کچ بندغ آتے تینا جان تے ندر کروئی تمتوکہ۔ قومی آجوئی بیرہ اسہ نعرہ ئس افک بلکن مُرغُن آ سیاسی جدوجہد، پاش انگا مسخت و بے کچ آ قربانی تا بھرم ءِ۔ بلوچ و سندھی ڈغار تیا برجاء انگا لٹ و پل و قوضہ نا تسلسل نہ بیرہ دا قوم آتا چائند بلکن اوفتا بروکا وخت ئکن ہم خطرہ ءِ۔ انتئے کہ اوفتیکن ڈغار نا سوال بیرہ ڈغار نا اف بلکن قومی وجود، چائند و بروکا نسل آتا بقاء ءِ۔
ڈاکٹر نسیم بلوچ پارے کہ بلوچ و سندھی قیادت ئے تینا قومی آ چائند، سیاسی تنظیم و جتا جتا آ خواست آتا قدر ئے کرسہ بندغی حق، زوراکی ئٹ بیگواہی، سیاسی قیدی ، قدرتی مڈی و جہانی پڑ آتیا بھلنی و ایلو بشخ آتیٹی اواری ئٹ جدوجہد کروئی ءِ، کمک کننگ نا بنیات آ جزباتی نعرہ تا جہہ آ اسٹ ایلو نا قدر و برابری مروئی ءِ۔ حقیت ئٹ اواری ہندادے کہ ارٹ انگا قوم آک تینا چائند و خواست آتے مونا تخِسہ مشترکہ جیڑہ غاتے ایسر کننگ کن اسٹ ایلو نا رئی آ سلیر و ہمدڑدی ئے عملی اواری ئٹ بدل کروئی ءِ۔
ڈاکٹر نسیم بلوچ پارے کہ دیہاڑ بلوچ و سندھی قوم ئے بھاز ٹپی کرینے، ولے تاریخ موقع ہم ایتک، و دا تومکا قوم آتا مون آ تینا قومی ریاست و سیاسی نظام آتے بنیات آن جوڑ کننگ نا جوانو موقع ئس ساڑی ارے۔ ضرورت ہندا گڑا نا ءِ کہ دانہ دانہ آ صلاحیت آتے اسٹ ایلو نا تجربہ تیان فائدہ ہرفِسہ سوگو آ سیاسی و سفارتی قوت آتیٹی بدل کیر۔
او بلوچ و سندھی قوم آتا نیام ئٹ اواری نا درشانی ئے کرسہ پارے کہ ہراڑے ہم نم ننے توار ایتورے سیاسی اسٹیج آن ہلیس مشکل انگا محاذ اسکان نم بلوچ ئے تینتو ہم کوپہ خنورے۔