بلوچ نیشنل موومنٹ (بی این ایم) نے جرمنی کے شہر بریمین میں مقبوضہ بلوچستان کی مجموعی صورتحال اور پاکستانی ریاست کے مظالم کو اجاگر کرنے کے لیے ایک احتجاجی مظاہرہ کیا۔
مظاہرین نے بی وائی سی کے رہنماؤں ڈاکٹر ماہ رنگ ، صبغت اللہ ، بیبو ، گلزادی ، بیبگر بلوچ اور سید بی بی شریف کی گرفتاریوں پر بھی بات کی اور بتایا کہ انسانی حقوق کے مذکورہ کارکنان کو بلوچستان میں انسانی حقوق کے لیے آواز اٹھانے پر جعلی مقدمات اور جھوٹی عدالتی کارروائیوں کے ذریعے سزا دی گئی ہے۔
مقررین نے بلوچ نیشنل موومنٹ ( بی این ایم ) کے چیئرمین ڈاکٹر نسیم بلوچ کے والد ، چچا اور ماموں کی جبری گمشدگی کو بھی اجاگر کیا جنھیں محض ڈاکٹر نسیم بلوچ کی سیاسی سرگرمیوں کی بنیاد پر نشانہ بنایا گیا ہے ، ان کا خاندان شدید ریاستی دباؤ کا شکار ہے یہاں تک کہ ان کی بہن سے طاقت کے زور پر پریس کانفرنس کروا کر ڈاکٹر نسیم بلوچ سے لاتعلقی کا بیان دلوایا گیا ہے۔
مظاہرے سے خطاب کرتے ہوئے مقررین نے کہا کہ ریاستِ پاکستان بلوچستان میں لوگوں کو بڑے پیمانے پر اجتماعی سزا کا نشانہ بنا رہی ہے۔ حراستی قتل اور جبری گمشدگیاں معمول بن چکی ہیں۔ قابض پاکستانی ریاست بلوچستان میں لوگوں کے گھروں کو مسمار کر کے انھیں جبری نقل مکانی پر مجبور کر رہی ہے۔
انھوں نے کہا کہ جبری گمشدگی کے نتیجے میں پیدا ہونے والی بے یقینی کی صورتحال ایک گہرا نفسیاتی درد بن جاتی ہے۔ یہ صرف جبری لاپتہ فرد کا مسئلہ نہیں رہتا بلکہ پورے خاندان کا کرب بن جاتا ہے۔ مائیں روزانہ کسی خبر کی منتظر رہتی ہیں، باپ شدید ذہنی دباؤ اور بے بسی میں زندگی گزارتے ہیں، جبکہ بچے خوف اور جذباتی عدم استحکام کے ساتھ بڑے ہوتے ہیں۔ زندگی معمول پر نہیں رہتی، حتیٰ کہ روزمرہ کے کام بھی مشکل ہو جاتے ہیں۔
مقررین نے مزید کہا کہ محض کسی ایک فرد کی سیاسی سرگرمیوں اور وابستگیوں کی بنیاد پر اس کے خاندان کے دیگر افراد کو نہ صرف نفسیاتی، مالی اور معاشرتی طور پر نقصان پہنچایا جاتا ہے، بلکہ بعض صورتوں میں بلوچ سماج پر دباؤ بڑھانے اور خوف پھیلانے کے لیے انھیں قتل بھی کر دیا جاتا ہے۔ جبری گمشدگان کے اکثر خاندان خاموشی اختیار کرتے ہیں، اس کے باوجود انھیں اپنے پیاروں کی لاشیں مل رہی ہیں جنھیں پاکستانی فوج حراست کے دوران قتل کر رہی ہے۔
انھوں نے بین الاقوامی برادری پر زور دیا کہ وہ اپنی ذمہ داریوں کا احساس کرتے ہوئے بلوچستان میں انسانی حقوق کی بحالی اور بلوچ قوم کے حقِ خود ارادیت کی حمایت کرے۔ بلوچ قوم اپنی کھوئی ہوئی آزادی کی بحالی کی مستحق ہے۔
احتجاجی مظاہرے سے عمیر اور اکبر بلوچ نے خطاب کیا ارو بلوچستان کی گھمبیر صورتحال کے بارے میں پمفلٹس تقسیم کیے گئے۔