بلوچستان مچکی ڈنڈ ءِ روان ءُ چاگردی آزار ءِ تہ ءَ اِنت : بی این ایم ءِ ماں جرمنی ءَ زھرشانی

بلوچستان مچکی ڈنڈ ءِ روان ءُ چاگردی آزار ءِ تہ ءَ اِنت : بی این ایم ءِ ماں جرمنی ءَ زھرشانی

دوشمبے ، 6 جولائی ، 2026 | بی این ایم ءِ زھرشانی

بلوچ راجی زْرمبشت ( بی این ایم ) ءَ ماں جرمنی ءِ شھر بریمین ءَ زور گپتیں بلوچستان ءِ جاور ءُ پاکستانی مھترھند ءِ زوراکیانی سھرا کنگ ءَ زھرشانی یے کرتگ۔

زھرشانی کنوکاں بی وائی سی ءِ راھشون ڈاکٹر ماہ رنگ ، صبغت اللہ ، بیبو ، گلزادی ، بیبگر ءُ سید بی بی شریف ءِ دزگیریانی سر ءَ گپ جتگ ءُ گْوشتگ کہ مردمی اگبالانی نام گپتگیں کارکن ماں بلوچستان ءَ مردمی اگبالانی بارہ ءَ گپ جنگ ءِ پد ءَ دورگیں کیس ءُ دروگیں آمیدگسی کارروائیانی پارست ءَ ڈنڈ دیگ بیتگ اَنت۔

گْوشتانک دیوکاں بلوچ راجی زْرمبشت ( بی این ایم ) ءِ سرکماش ڈاکٹر نسیم ءِ پت ، پت ءِ برات ءُ مات ءِ براتے ءِ زور بیگواھی سھرا کرت کہ آ ایوک ءَ ڈاکٹر نسیم ءِ سیاسی سرگرمیانی برپشت ءَ نشانگ کنگ بیگ ءَ اَنت ، آئی ءِ کھول ترندیں وڑے ءَ مھترھندی زور ءِ دیمپان اِنت ۔ آئی ءِ گھار زور پریس کانفرنس ءَ پرمایگ بیتگ داں چہ وتی برات ءَ وتی سیادی ءِ سندگ ءِ گپ ءَ بہ جنت۔

گوں زھرشانی کنوکاں گپ جنان تْرانکاراں گْوشتگ کہ پاکستانی مھترھند بلوچستان ءِ مردماں مزنیں کچے ءَ مچکی ڈںڈ ءِ نشانگ کنگ ءَ اِنت۔دزگیریں کوش ءُ زور بیگواھی ھم روچیگیں کار اَنت۔ زور گریں پاکستانی مھترھند بلوچستان ءَ مردمانی لوگاں ڈرینگ ءُ آیاں پہ زور درانڈیھ بیگ ءَ ناچار کنگ ءَ اِنت۔

آیاں گْوشت کہ زور بیگواھیانی پد ءَ بے باوری ءِ جاور جھلانکیں روانی دردے جوڑ بیت۔ اے ایوک ءَ زور بیگواھیں مردمے ءِ جیڑہ نہ بیت بلکیں سرجمیں کھول ءِ درد بیت۔ مات ھم روچ ھالے ءِ ودار ءَ بہ اَنت ، پت پریشانیانی آماچ بیت ءُ گوں بے وسی ءَ زند گوازین ایت ، چک ترس ءُ گوں ناداشتیں مارشتاں مزن بہ اَنت۔ زند انچائیں رنگے ءَ نہ مان ایت ، داں ھم روچیگیں کارانی کنگ ھم گْران بیت۔

آیاں چد ءُ دیم گْوشتگ کہ ایوک ءَ مردمے ءِ سیاسی سرگرمی ءُ سیادیانی بنیاد ءَ آئی ءِ کھول ناں ایوک ءَ روانی ، مالی ءُ چاگردی تک ءَ تاوان دیگ بیت بلکیں باز بر ءَ بلوچ چاگرد ءِ سر ءَ زور دیگ ءُ ترس ودی کنگ آ کشگ ھم بہ اَنت۔ زور بیگواھیں مردمانی گیش تریں کھول ھچ نہ گْوش اَنت ، چہ ایشاں پد ھم آیاں وتی کس ءُ مردمانی کںٹ دست کپگ ءَ اَنت کہ پاکستانی لشکر دزگیریں جاھاں کشگ ءَ اِنت اش ۔

آیاں چہ میان راج ءَ لوٹ کرتگ کہ آ وتی زمہ واریاں سما بہ کنت ءُ بلوچستان ءَ مردمی اگبالانی سرسبزینگ ءُ بلوچ راج ءِ وتواجھی ءِ پلہ مرزی بہ کنت۔بلوچ راج ءَ اگبال ھست کہ آئی ءِ پچ گپتگیں آجوئی سرسبزینگ بہ بیت۔

اے زھرشانی ءَ عمیر ءُ اکبر ءَ گپ جتگ ءُ بلوچستان ءِ ناگیگیں جاورانی سر ءَ پنتاک بھر کنگ بیتگ۔