بلوچ راجی زْرمبشت ( بی این ایم ) ءِ جارکش ءَ گل ءِ باسک محمد رمضان ءِ زور بیگواھی ءِ 16 می سال ءِ درگت ءَ وتی درشان ءَ گْوشتگ محمد رمضان چہ 25 جولائی 2010 ءَ پاکستانی لشکر ءِ زندان ءَ اِنت۔ آ چہ زیرو پوائنٹ اوتھل ءَ دزگیر کنگ بیتگ ، ھما وھد ءَ کہ آ گوادر ءَ روگ ءَ اَت۔
جارکش ءِ گْوشگ اِنت کہ محمد رمضان ءُ پہ آجوئی ءَ بندیگیں دگہ مردمانی دیمونی پہ بلوچستان ءِ آجوئی ءِ ٹوھیں مول ءَ اَنت۔زورگریں لشکر گوں وتی آزارجاھانی پارست ءَ اے بندیگانی سسا ءُ لیکہ ءِ گمسار کنگ ءَ بے سوب بیتگ۔ زوراکی ءِ اے زمانگ آسر بیگی اِنت ، بلوچستان آجو بیت ءُ چہ زوراکاں آیانی زوراکیانی جست ھم الم گرگ بیت۔
درشان ءَ گْوشگ بیتگ کہ بلوچ راج وتی زور بیگواھاں بھ نہ شموش ایت۔ ما 16 می سدھک ءَ پرتگیزانی بگیری ءَ گھگیری ءِ چیدگ جوڑ بیتگیں وتی راجی بامرد ھمل ء جیھند ءَ داں مروچی یات کن ایں ، ھمے پیم ما نہ ھل ایں کہ انگیں زمانگ ءِ راجی بندیگ گْوست ءِ مجانی تہ ءَ گور بہ بہ اَنت۔اے دیمونی پہ آجو ءُ مردمی بنیادانی سر ءَ برجاھیں بلوچستان ءِ پانک ءُ پھریزگ ءَ مدام مئے راھشونی کن اَنت ءُ مارا ھمے سما ءَ پرین اَنت کہ مئے منزل کجام اِنت، ھمے دیمونی زْرمبشتاں زندگ دار اَنت ءُ راجاں چہ گسر بیگ ءَ پھریز اَنت۔