زور بیگواھی ءِ آماچ بیتگیں مردمانی جھانی روچ ءِ دم ءُ درگت ءَ بلوچ راجی زْرمبشت ( بی این ایم ) ءَ ماں نیدرلینڈز ءِ شھر اتریخت ءَ زھرشانی کرتگ۔ زھرشانی ءِ مول بلوچستان ءَ برجاھیں زور بیگواھیانی ناگیگیں جاور ءِ نیمگ ءَ میان راج ءِ دلگوش ءِ پرینگ ءُ گوں سانمند بیتگیں مردماں یکجھتی ءِ درشان اَت۔
اے زھرشانی ءَ پشتون سیاسی کارکنان ھم بھر زرت ، زور بیگواھی ءِ آماچ بیتگیں مردم ءُ گوں آیانی کھول ءَ یکجھتی پیش داشت ۔ زھرشانی کنوکاں زور بیگواھیں مردمانی عکس دست ءَ بیتگ اَنت ، آیاں گوں کاگد ءُ جرنبشتاں مزدانک ءِ لوٹ کرتگ ءُ زور بیگواھیانی زیت آسر کنگ ءِ سر ءَ زور داتگ۔
گوں مچی ءَ بی این ایم نیدرلینڈز ءِ سروک مھیم عبدالرحیم ، بی این ایم ءِ رسانک ، آئی ٹی ءُ ربیدگی تک ءِ راھوتکار عابد جان قادر ، ڈاکٹر لطیف ، ثناء اللہ ءُ مردمی اگبالانی کارکن زرخان ءَ گپ جتگ۔ آیاں بلوچستان ءَ زور بیگواھیانی بلوچ چاگرد ءِ سر ءَ جھلانک ءُ بیرانی آروکیں سانانی سر ءَ گپ جتگ۔
آیاں گْوشتگ کہ بلوچستان ءَ کزا چوشیں لوگے بہ بیت کہ چہ زور بیگواھی ءِ شوپچ ءَ پھریز اتگ ۔ سرجمیں بلوچستان ءَ کھول وتی دوستیگیں مردمانی آوار ءُ زور بیگواھی ءَ پد شول کشیں باریگ اِنت کہ دردناک ءُ نادلجمیں زندے گوازینگ ءَ اَنت۔ گیش تر کھول وتی دوستیگیں مردمانی جاہ ، جاور ءُ آسر ءِ بارہ ءَ ھچ سھی نہ اَنت ، چہ ایشی ءَ آیانی آزار چد ءُ گیش تر بیت۔
آیاں گْوشتگ کہ زور بیگواھی بلوچستان ءَ برجاھیں مردمی اگبالانی شوپچ ءِ سھرائیں چیدگے جوڑ بیتگ۔ سیاسی ءُ چاگردی کارکن ، نودربر ، استاد ، تاکار ، وکیل ، نبشتہ کار ، مردمی اگبالانی کارکن ءُ آ دگہ شھرمنندانی پجیگ ءَ چاگرد ءِ جتائیں تک ءُ پھنات چہ اے شوندات ءَ سانمند بیگ ءَ اَنت۔
گْوشتانک دیوکاں گْوشتگ بلوچستان بلوچ راج ءِ سرڈگار اِنت ءُ بلوچ راج پہ وتی وتواجھی ءَ جھد ءَ اِنت۔ آیاں گوں بلوچ زْرمبشت ءَ پشتون راج ءِ یکشلیں یکجھتی ھم ساڑاتگ ءُ گْوشتگ کہ پشتون راج ءَ زوراکی ، نامزدانکی ءُ مردمی اگبالانی بگیریانی سر ءَ مدام بلوچ راج ءِ پلہ مرزی کرتگ۔
آیاں چد ءُ دیم گْوشتگ کہ زور بیگواھی بلوچستان ءَ بلوچ راج ءِ بگیری ءَ برجاھیں چکچینی ءِ بھر اِنت۔ ھزاراں مردم یکشل ءَ زور بیگواھی ، درآمیدگسی کوش ءُ مردمی اگبالانی دگہ سنگینیں بگیریاں سرجمیں بلوچستان ءَ ترس ، بے تاھیری ءُ نادلجمی ودی کرتگ۔
بلوچ راجی زْرمبشت ( بی این ایم ) ءَ لوٹ کرتگ کہ سرجمیں زور بیگواھیں مردمانی بارہ ءَ آیانی کھول زیت سھی کنگ بہ بہ اَنت ، آیاں گْوشگ بہ بیت کہ آیانی دوستیگیں مردم کج ءَ اَنت ، آیانی جاور ءُ باندات ءِ بارہ ءَ سھی کنگ بہ بہ اَنت۔ زور بیگواھیانی دْرچ زیت بند کنگ بہ بیت ، ھمے گزارش کہ مردمی اگبالانی سر ءَ دیم ءَ آیگ ءَ اَنت آیانی سر ءَ آزاد ءُ شیشاریں رنگے ءَ پٹ ءُ پول کنگ ءُ ایشانی زمہ وار جست کنگ بہ بہ اَنت۔