چہ بلوچ راجی زْرمبشت ( بی این ایم ) ءِ نیمگ ءَ ماں لندن ءِ ٹن ڈاؤننگ اسٹریٹ ءِ دیم ءَ ڈاکٹر دین محمد ءِ زور بیگواھی ءِ 17 سال سرجم بیگ ءَ زھرشانی کنگ بیتگ ۔زھرشانی ءِ مول برتانیا ءِ سرکار ، راجانی سنت ، مردمی اگبالانی میان راجی تْرامگیج ءُ میان راج ءِ دلگوش ءِ پرینگ اِنت ۔ اے مچی ءِ تہ ءَ بلوچستان ءِ سیاسی ءُ چاگردی جاور ، آجوئی ءِ زْرمبشت ، زور بیگواھی ، مچکی سزا ءِ شوندات ءُ مردمی اگبالانی مزنیں بگیریانی نیمگ ءَ دلگوش گْور کنگ بیتگ۔
گوں زھرشانی کنوکاں گپ جنان بلوچ راجی زْرمبشت ءِ کستریں کمک سرکارگشاد حسن دوست ءَ گْوشتگ پاکستانی لشکر بلوچ سیاسی کارکنانی بگیری ءَ مچکی سزا ءِ شوندات ءِ سر ءَ گوں ترندی ءَ کاربند اِنت۔ آئی ءَ گوں میان راج ءُ میان راجی تْرامگیجاں گْوشتگ کہ آ پاکستان ءَ کڈن بہ کن اَنت ءُ آئی ءَ چہ وتی نیمگ ءَ دیگ بیتگیں مالی کمک ءِ سر ءَ چار ءُ بہ چار بہ کن اَنت۔
حسن دوست ءَ گوں جھان ءِ ھمک کنڈ ءَ نشتگیں بلوچاں دزبندی کرتگ کہ آ ماں آجوئی ءِ زْرمبشت ءَ وتی کرد ءِ پرکار کنگ ءَ بلوچ راجی زْرمبشت ( بی این ایم ) ءَ ھوار بہ بہ اَنت۔
دگہ تْرانکاراں ڈاکٹر دین محمد ءِ’ 17 سال ءِ دراجیں زور بیگواھی ءُ یکشلیں بندیگی ءُ آزار ‘ مردمی اگبالانی بدتریں لگتمالی لیک اتگ۔ آیاں گْوشتگ زورگپتیں بلوچستان ءَ زور بیگواھی نی مھترھندی شوندات ءِ رنگ ءَ اِنت کہ میان راجی راھبندانی سھرائیں بگیری اِنت۔آیاں چد ءُ دیم گْوشتگ ھزاراں بلوچ کھول چہ اے شوندات ءَ سانمند بیتگ ءُ سیاسی کارکنانی کھول بیرگری ءِ نشانگ کنگ بیگ ءَ اَنت۔
تْرانکاراں درشانتگ کہ بی این ایم ءِ سرکماش ءِ پت ، ناکو ءُ دگہ نزیکیں سیاد ھم زور بیگواہ کنگ بیتگ اَنت ، کہ پرایمنیں سیاسی راھشونے ءِ کھول ءَ مچکی سزا دیگ ءِ پدریں درورے۔
زھرشانیاں بھر زیروکاں ڈاکٹر دین محمد ءُ دگہ زور بیگواھیں مردمانی عکس ، پوسٹر ءُ جرنبشت گون بیتگ اَنت ءُ آیانی زیت یلھی ، مچکی سزا ءِ آسر کنگ ، مردمی اگبالانی لگتمالی ءِ دارگ ءُ بلوچستان ءِ آجوئی ءِ پلہ مرزی ءَ اوگام جتگ اش۔
مراگش ءِ جارچین بی این ایم برتانیائی تک ءِ کارگشاد کمبربخشی اَت ، بی این ایم کستریں کمک سرکارگشاد حسن دوست ، سلیم الہی ءُ کفایت کے پی ءَ تْران کرتگ۔