نزیک ءِ دو دھک گْوستگ بلے ڈاکٹر دین جان ءِ کھول دنیگت نہ زانت کہ باریں آ زندگ اِنت یا ناں ۔ ڈاکٹر دین جان ذمہ واریں ڈاکٹر ءُ راجدوستیں راھشونے ، کہ پاکستانی لشکر ءَ 28 جون 2009 ءَ چہ نادراھجاہ ءَ دزگیرکنگ ءَ پد پریں ھپدہ سال اِنت کہ زور بیگواہ کرتگ۔
اے گپ تْرانکاراں جرمنی ءِ شھر برلن ءَ بلوچ راجی زْرمبشت ( بی این ایم ) ءِ زھرشانی ءَ گپ جنان ءَ گْوشتگ اَنت ۔اے زھرشانی الیگزینڈر پلاٹز ءَ ڈاکٹر دین محمد بلوچ ءِ زور بیگواھی ءِ 17 سال سرجم بیگ ءِ پژدر ءَ بیتگ۔
گْوشتگ دیوکاں گْوشتگ ڈاکٹر دین محمد ءَ پہ بلوچ راج ءِ آجوئی ءَ پرایمنیں جھد کرتگ ، ءُ گوں آئی ءِ پجیگ ءَ ھزاراں بندیگانی دیمونی پہ بلوچ راج ءِ آزاتی ءُ رژناھیں باندات ءَ اِنت۔
بھر زیروکاں جرنبشت ، پوسٹر گون بیتگ کہ آیانی سر ءَ ڈاکٹر دین محمد ءُ دگہ سیاسی کارکنانی عکس اَت اَنت۔ آیانی رد ءَ ، اے کارکن پاکستانی لشکر ءَ ناراھیں رنگے ءَ دزگیر کنگ ءَ پد زور بیگواہ کرتگ اَنت۔ ماں زور گپتیں بلوچستان ءَ مردمانی زور بیگواھی ءِ برجاھیں جیڑہ ءِ بارہ ءَ سرپدی ودی کنگ ءَ مردمانی تہ ءَ پنتاک ھم بھر کنگ بیتگ۔
گوں زھرشانی ءَ بلوچ راجی زْرمبشت ( بی این ایم ) ءِ بنجاھی پتر ءِ باسک ھمل خان ، بی این ایم جرمنی تک ءِ کماش اصغر علی ءُ مصطفی شاھوانی ءَ گپ جتگ۔