ڈاکٹر دین جان ءِ شول کشیں زور بیگواھی ءِ سان داں مروچی ھم گل ءُ کھول ءِ سر ءَ ھست اَنت : بی این ایم ءِ ماں آواران ھنکین ءَ بیتگیں مراگش ءَ ڈاکٹر ناظر ، چیف اسلم ءُ دگرانی تْران

بلوچ راجی زْرمبشت ( بی این ایم ) ءِ راھشون ءُ پہ آجوئی ءَ بندیگیں ڈاکٹر دین محمد ءِ 17 سال ءِ شول کشیں زور بیگواھی ءِ دم ءُ درگت ءَ بلوچ راجی زْرمبشت ( بی این ایم ) ءِ ماں آواران ھنکین ءَ بیتگیں مراگش ءَ تْران کنان ، گپ جنوکاں گْوشتگ ما اے گپ ءِ سر ءَ پھر بند ایں کہ مئے سیادی گوں انچیں راجی گلے ءَ اِنت کہ آئی ءِ راھشوناں وتی ساہ ءُ آجوئی ءِ بے دروریں دیمونی داتگ ءُ جھد ءِ تہ نوکیں گْوستانکے نبشتگ۔ ھمے مزنیں دیمونیانی برورد ءَ مروچی ما بلوچ راجی زْرمبشت ( بی این ایم ) ءِ باسکی ءِ سر ءَ پھربند ایں۔

اے نیاد ءِ گچینی مھمان بی این ایم ءِ مردمی اگبالانی کارگشاد ڈاکٹر ناظر نور اَت ۔ چہ آئی ءَ ابید مراگش ءِ تہ ءَ بی این ایم ءِ بنجاھی پتر ءِ باسک چیف اسلم ، آواران ھنکین ءِ کمک سرکماش تلار ناز ءُ ھنکین ءِ کلیتدار میرک ءَ گپ جتگ۔ مراگش ءِ جارچین شھمیر منان بنزہ ءِ کارگشاد ودار اَت۔

تْرانکاراں چد ءُ دیم گْوشتگ ڈاکٹر دین جان ءِ 17 سال ءِ دراج ءُ آزار دھیں زور بیگواھی کہ نزیک ء شش ھزار ، دو سد ءُ پنچ روچ اَنت یکشلیں مچکی سزا ءِ درور اِنت ، ایشی ءِ ناں ایوک ءَ آئی ءِ کھول بلکیں سرجمیں پارٹی ءُ راجی زْرمبشت ءِ سر ءَ جھلانک ءُ دیرمانیں سان اَنت۔ اے دراجیں زمانگ ءِ زوراکی ، نادلجمی ءُ مردمی شوپچ ءِ انچیں داستانے کہ ایشی ءِ ٹپ مروچی ھم آزگ اَنت۔

ڈاکٹر ناظر نور ءَ وتی گپانی تہ ءَ زور بیگواھی ءِ راھبندی ءُ مردمی اگبالانی پژدر ءَ گپ جتگ ءُ گْوشتگ کہ زور بیگواھی زوراکی ءِ سکا بدیں تھرے ، کہ مردمے چہ راھبنداں ڈن آوار جنگ بیتگ ، آئی ءِ ھستی ءُ زندانی بیگ ءَ انکار کنگ ءُ آ چہ راھبندی پانک ءَ زبھر کنگ بیت۔ آئی ءَ گْوشتگ اے کار ناں ایوک ءَ مردمے نشانگ کنت بلکیں آئی ءِ کھول ءُ سرجمیں راج ءَ روانی ءُ چاگردی آزار ءِ آماچ کنت۔