بلوچ راجی زْرمبشت ( بی این ایم ) جرمنی تک ءِ این آر ڈبلیو بنزہ ءِ گچینکاریانی رد ءَ حبیب کارگشاد ءُ مھیم کمک کارگشاد گچین کنگ بیتگ اَنت ، وجاھت ءُ ولید پہ تک ءِ پتر ءَ باسک گچین کنگ بیتگ اَنت۔
اے نیاد ءَ ماں جرمنی ءَ گل ءِ سرجمیں کارءُ کردانی سر ءَ ھم چمشانک دیگ بیتگ ءُ اے گپ ءِ نیمگ ءَ دلگوش گْور کنگ بیتگ کہ گوں جرمنی ءِ نندوکیں مردماں راھوت ءِ گیش کنگ ءَ جرمن زبان ءَ سرپدی دیگ بیت ، داں جرمنی ءِ سیاستدان ءُ مردم بلوچستان ءِ انیگیں جاور ءُ آجوئی ءِ زْرمبشت ءِ بارہ ءَ سانمندیں رنگے ءَ سرپد کنگ بہ بہ اَنت۔
نیاد ءَ اے نیمگ ءَ دلگوش پرینگ بوت کہ پہ گل ءِ کلوہ ءِ مزنیں کچے ءَ تالان کنگ ءَ گوں نوک ءُ سانمندیں وڑ ءُ ڈولاں کار کنگ بہ بیت۔
نیاد ءِ پاگواجہ جرمنی تک ءِ کارگشاد لقمان اَت ءُ گچینی مھمان جرمنی چیپٹر ءِ کمک سرکماش صادق سعید اَت۔بنزہ ءِ پیسرگیں کارگشاد قاسم ءَ جارچینی کرت ءُ گچینکاریانی سروکی بی این ایم جرمنی تک ءِ پیسرگیں سرکماش شرحسن ءَ کرت۔
اے رد ءَ گل ءِ کارانی سر ء گپ جنان گل ءِ باسک جبار ، شارق ، مجیب، شیرجان ءُ دگراں ھم گل ءِ پرکار کنگ ءَ وتی سر ءُ سوج دات اَنت۔