بلوچ راجی زْرمبشت ( بی این ایم ) ءَ لندن ءِ دمگ ویسٹ منسٹر ءِ ڈاؤننگ اسٹریٹ ءِ دیم ءَ زھرشانی کرتگ ءُ پہ سانمند بیتگیں مردمانی تْرانگ ءَ ڈیوا بالینتگ۔ اے زھرشانی ءِ من بلوچستان ءِ دمگ سوراب ءَ زورگریں پاکستانی لشکر ءِ بیڑاں شھرمنندانی کوش ءِ ایرجنگ ءُ پہ سانمندیں مردماں منگہ ءُ نیکیں واھگ درشانگ اَت۔
زھرشانی کنوکانی رد ءَ 12 اگست ءَ سوراب ءَ بیتگیں پاکستانی بالی لشکر ءِ بیڑاں جنین ، چک ءُ پیرینانی پجیگ ءَ انچائیں شھرمنند کشگ بیتگ اَنت۔ زھرشانی ءِ میان ءَ ڈیوا بالینگ ءُ گوں سانمند بیتگیں مردمانی کھولاں ھم بستگی درشانگ بیتگ۔چہ میان راج لوٹ کنگ بیتگ کہ اے کوشانی شیشاریں رنگے ءَ پٹ ءُ پول کنگ ءُ میاربار جست کنگ بہ بہ اَنت۔
اے دم ءُ درگت ءَ بی این ایم ءِ برتانیا تک ءِ سرکماش منظور ءَ وتی درشان ءَ گْوشتگ اے زھرشانی ءِ بنکی مول میان راج ءَ بلوچستان ءِ ناگیگیں جاور ءِ بارہ ءَ سرپدی دیگ اِنت۔آیاں گْوشتگ کہ دمگ ءَ برجاھیں گر ءُ چیلانی گیشینگ ءِ پاداریں راہ بلوچ راج ءِ آجوئی ءِ اگبال ءِ منگ اِنت۔
بی این ایم ءِ دری کارانی تک ءِ راھوت کار نیاز ءَ چہ میان راج ءَ لوٹ کرتگ کہ آ بلوچستان ءَ مردمی اگبالانی جاور ءِ سر ءَ دلگوش بہ کنت۔ آیاں لوٹ اتگ کہ پاکستان ءَ دیگ بیتگیں مالی ءُ لشکری کمک گوں ترندی ءَ چارگزار بہ بیت داں اے آسراتی انچائیں مردمانی بگیری ءَ کارمرد مہ بہ اَنت۔