بلوچ راجی زْرمبشت ( بی این ایم ) ءِ چیردستی ءَ نیدرلینڈز ءَ زھرشانی ءُ روانک کشگ بیتگ ، ایشی ءِ تہ ءَ بلوچستان ءِ ھنکین سوراب ( گدر ) ءَ پاکستانی بالی لشکر ءِ بمب گواری گوں ترندی ءَ ایرجنگ بیتگ۔ زھرشانی کنوکاں اے ارش ءَ جنین ءُ چکانی پجیگ ءَ انچائیں شھرمنندانی کوش ءِ سر ءَ سکا بے تاھیری درشانتگ ، چہ میان راج ءَ زیت دلگوش گْور کنگ ءِ لوٹ کرتگ ءُ گْوشتگ کہ سانمندیں مردماں مزدانک بہ رس ایت۔
گوں مچی ءَ تْران کنان بی این ایم ءِ باسک ڈاکٹر لطیف ، شئے جامی ءُ عصا بجار ءَ سوراب ءِ ویل سنگینیں مردمی سوپچے لیک اِت۔ آیانی گْوشگ اَت کہ بلوچستان ءَ مردمی اگبالانی جاور روچ پہ روچ بدتر بیان اِنت ، میتگ ترس ءِ انگر ءَ اَنت ءُ اے رد ءَ میان راج ءِ بے تواری سکا بے تاھیر کنوک اِنت۔
زھرشانی کنوکاں چہ راجانی سنت ، یورپی سنت ءُ مردمی اگبالانی جھانی ءُ ھندی گلاں لوٹ کرت کہ آ سوراب ویل ءِ آزاد ءُ شیشاریں پٹ ءُ پول بہ کنائین اَنت داں راستی پدر بہ بیت۔ آیاں چہ نیدرلینڈز ءِ چاگردی گل ، سیاسی جھگیر ءُ یورپی ڈیھانی سر ءَ زور دات کہ آ ماں بلوچستان ءَ مردمی اگبالانی لگتمالی ءِ سر ءَ دلگوش بہ دے اَنت ءُ سانمند بیتگیں مردمانی توار جوڑ بہ بہ اَنت۔
زھرشانی ءِ آسری ءَ بی این ایم ءِ باسکاں اے واھگ درشانتگ کہ ماں بلوچستان ءَ پہ شھرمنندانی پھریزگ ءُ مردمی اگبالانی سرسبزینگ ءَ نیدرلینڈز ءِ پجیگ ءَ دگہ یورپی ڈیھاں ھرچ تک ءَ توار چست کنگ ءِ دْرچ برجاہ دارگ بیت۔