بلوچ راجی زْرمبشت ( بی این ایم ) راجانی سنت ءِ مردمی اگبالانی پتر ءِ 63 می نیاد ءَ 24 ستمبر ءَ بہ گر داں 26 ستمبر 2026 ءَ ماں جنیوا ءَ ’’ چیئرمین زبیر : گھگیری ءِ رژنا ‘‘ ءِ بنگپ ءَ سئے روچی سیاسی ءُ سفارتی مھیمے ھلائین ایت۔اے مھیم بی این ایم ءِ شھمیریں راھشون چیئرمین زبیر ءِ سری سالروچ ءِ درگت ءَ آئی ءِ نام ءَ کنگ بیتگ۔24 ستمبر 2025 ءِ شپ ءَ پاکستانی لشکر ءَ آئی ءِ لوگ ءِ سر ءَ بیڑ برتگ ءُ چیئرمین زبیر گوں آئی ءِ ھمراہ نثار جان ءَ کشتگ۔
مھیم ءِ بندات ءَ 24 ستمبر ءَ جنیوا پریس کلب ءَ ’’ زور گپتیں بلوچستان دو راھی ءِ سر ءَ : مردمی اگبال ، مزدانک ءُ آجوئی ءِ زْرمبشت — چیئرمین زبیر ءِ رژنا ءَ ستک درشانی ‘‘ ءِ بنگپ ءَ میان راجی کانفرنس بیت۔ کانفرنس ءَ بلوچستان ءِ مردمی اگبالانی جاور ، زور بیگواھی ، در آمیدگسی کوش ، مچانکی ڈنڈ ، سیاسی آجوئی ، بلوچ راجی زْرمبشت ءِ گْوستانگ ءُ سیاسی پژدر ءُ بلوچستان ءِ ابرمی مڈی ءُ پرارزشتیں شورانی سر ءَ گپ بیت۔ اے دم ءُ درگت ءَ چیئرمین زبیر ءِ سیاسی زند ءُ جھد ءِ سر ءَ دستاویزی تامرے پیش دارگ بیت۔ پجیگ ءَ چہ زْرمبش شنگکار ءِ نیمگ ءَ ’’ زبیر بلوچ : آئی ءِ جند ءِ زبان ءَ — زند ، گھگیری ءُ بلوچ راجی زْرمبشت‘‘ ءِ ھم دیمدرائی بیت۔
25 ستمبر ءَ بی این ایم چہ جنیوا ءِ ڈوری ( Geneva lakeside ) ءَ بہ گر داں پیلس ڈیس نیشنز ءِ بروکن چیئر ءَ روانک ئِے کش ایت ءُ زھرشانی کنت ۔ 25 ءُ 26 ستمبر ءَ آ اود ءَ دو روچی عکسانی نمائش ءُ پہ مردمانی سرپدی دیگ ءَ گدانے جنگ بیت۔ مھیم ءِ میان ءَ بی این ایم ءِ بولک راجانی سنت ءِ ھمگرنچیں ورکنگ گروپس ، گچینی جھگیر ءُ مردمی اگبالانی رد ءَ واکداراں گند ءُ نند کن اَنت، آیاں بلوچستان ءِ بارہ ءَ دستاویز دے اَنت ءُ ماں مردمی اگبالانی پتر ءَ بلوچستان ءِ جاور ءَ سھرا کن اَنت۔