بلوچ راجی زْرمبشت ( بی این ایم ) ءَ نیدرلینڈز ءِ جتائیں شھر ( ایندھوون ، یوتریخت ، دی ہیگ ، ایمسٹرڈم ءُ زوولے ) ءَ زورگپتیں بلوچستان ، بلوچ راجی آزاتی ءِ زْرمبشت ءُ چہ پاکستان ءِ نیمگ ءَ بلوچ راج ءَ دیمپانیں جیڑھانی بارہ ءَ سئے روچی مھم ھلائینتگ۔
اے مھم ءَ ڈاکٹر دین ءِ ھپدہ سال ءِ زور بیگواھی ، زور گپتیں بلوچستان ءَ مردمی اگبالانی کارکنانی بگیری ءَ پاکستان ءِ آمیدگس ءِ بیڑ ، دورگیں بھتاماں ڈاکٹر ماہ رنگ ءُ صبغت اللہ ءِ زند بندیگی ءِ سزا ، بالاچ قادر ءُ دگرانی بگیری ءَ چہ پاکستانی لشکر ءِ نیمگ ءَ آمیدگساں زوراکی ءِ ابزارانی وڑ ءَ کارمرد کنگ ءُ پہ آیانی زند ءَ ترس ودی کنگ ءِ بنگپ سھرا کنگ بیتگ اَنت ۔
ڈاکٹر دین محمد ءَ 17 سال اِنت کہ پاکستانی لشکر ءِ بندیگجاھاں زور بیگواہ اِنت ، ءُ آئی ءِ کھول پہ آئی ءِ درائی ءَ چہ دْراجیں باریگے ءَ جھد ءَ اِنت۔ انیگیں روچاں آئی ءِ جنک ءُ بلوچستان ءَ مردمی اگبالانی نامی ئیں کارکن سمی دین یک برے پد ءَ بیھار دیگ بیتگ۔ آئی ءِ لوگ ءَ گوں پاکستانی لشکر ءَ ھمگرنچیں مردماں بیڑ برتگ ءُ لوگ ءِ مردم ترسینگ ءِ کوشست کرتگ اَنت۔ زانگ بہ بیت ڈاکٹر ماہ رنگ ءُ صبغت اللہ بی وائی سی ءِ راھشون اَنت ، کہ کوردیمگیں آمیدگس ءِ پارست ءَ زند بندیگی ءِ سزا دیگ بیتگ اَنت۔
بلوچ راجی زْرمبشت ءِ نام گپتگیں مھم ءَ اے جاور گوں پنتاکانی پارست ءَ سھرا کنگ بیتگ ءُ گوں ھندی مردماں گپ جنگ ءُ آیاں بلوچستان ءِ راستیں جاور گْوشگ بیتگ اَنت۔ بی این ایم ءِ باسکاں چہ یورپی سنت ءُ راجانی سنت ءَ لوٹ کرتگ کہ بلوچ انچیں راجے کہ آئی ءِ ربیدگ چہ ھندوستانی ربیدگاں گستا اَنت ءُ آیانی سرڈگار ( بلوچستان ) بھ یکجاھیں ھندوستان ءِ بھر نہ بیتگ۔ 1948 ءَ پاکستان ءَ بلوچستان زورگپتگ ءُ بلوچانی آجوئی پل گپتگ۔اے زورگری ءِ برجاہ دارگ ءَ پاکستانی مھترھند ءَ بلوچستان وتی ماں جھان ءَ بدنامیں لشکر ءِ دست ءَ داتگ ، کہ آ اود ءَ مردمی اگبالانی گوش مہ اش کنوکیں بگیری کنگ ءَ اِنت۔
آیاں چد ءُ دیم گْْوشتگ ابید چہ بلوچستان ءِ آجوئی ءَ آ اود ءَ مردمی اگبالانی سرسبزی ، چاگردی دیمروئی ءُ دمگ ءَ ایمنی برجاہ بیت نہ کنت۔ جھان مئے وتواجھی ءِ پلہ مرزی بہ کنت ءُ وتی مردمی ڈبو ءَ پیلو بہ کنت۔