بلوچستان ءِ آجوئی ءِ زْرمبشت ءِ بندیگیں راھشون ڈاکٹر دین محمد ءِ پاکستانی لشکر ءِ دست ءَ آوار جنی ءُ گْوستگیں 17 سال ءَ برجاھیں زوربیگواھی ءِ بگیری ءَ بلوچ راجی زْرمبشت ( بی این ایم ) ءَ زرباری کوریا ءَ زھرشانی کرتگ ۔ زھرشانی کنوکاں دلگوش پرینتگ کہ بلوچ راجی زْرمبشت ( بی این ایم ) بلوچستان ءِ آجوئی ءِ لوٹوکیں سیاسی گلے کہ آئی ءِ بنجاھی راھشون ڈاکٹر دین محمد ءَ پریں ھپدہ سال اِنت کہ پاکستانی آزار جاھاں بند کنگ ءُ زور بیگواہ کنگ بیتگ۔
زھرشانی کنوکاں پاکستانی واکدارانی جست ءُ پرس کنگ ءِ لوٹ کرتگ ءُ چہ میان راج ءَ پہ بلوچستان ءِ آجوئی ءَ کمک ءُ پلہ مرزی ءِ دست بندی کرتگ۔ آیاں بلوچستان ءَ زور بیگواھی ءِ جیڑہ سھرا کرتگ ءُ گْوشتگ میان راج سانمند بیتگیں کھولانی درد ءُ دورانی نیمگ ءَ دلگوش بہ دنت۔
ھمے رد ءَ گپ جنوکاں بی وائی سی ءِ راھشون ڈاکٹر ماہ رنگ ، صبغت اللہ ءُ بی ایس او ءِ سرکماش بالاچ قادر ءِ ’ کور دیمگیں آمیدگس ‘ ءِ پارست ءَ سزا دیگ ءِ بگیری ءَ ھم توار چست کرتگ ۔ آیاں گْوشتگ زورگپتیں بلوچستان ءَ زورگریں پاکستان ءَ بلوچانی سرجمیں اگبال پچ گپتگ اَنت۔ پہ مردمی اگبالاں توار چست کنگ ءِ پد ءَ بی وائی سی ءِ راھشون ءُ بالاچ قادر رنگیں نودربر نام گپتیں ’ کور دیمگیں آمیدگس ‘ ءِ پارست ءَ دروگیں بھتاماں سزا دیگ بیتگ اَنت۔
گْوشتانک دیوکاں گوں دلجمی ءَ درشانتگ کہ بلوچستان ءِ آجوئی ءِ جھد گوں زوراکیاں آسرینگ نہ بیت۔ بلوچستان ءَ مردمی اگبالانی لگتمالی ءِ پژدر پاکستان ءِ زورگری ءُ چہ بلوچ ءِ وتواکی ءَ انکار اِنت۔ بلوچ راج چہ وتی وتواجھی ءِ اگبال ءَ بٹکے ھم پشت ءَ کنزگ ءَ ساڑی نہ اِنت۔ پاکستان وتی زورگری ءَ آسر بہ کنت ءُ چہ بلوچستان ءَ در بہ کپ ایت۔