بلوچ راجی زْرمبشت ( بی این ایم ) ءِ جارکش ءَ وتی درشانے ءَ گْوشتگ کہ بلوچستان ءِ ھنکین نوشکے گْوستگیں لھتے ماہ اِنت کہ پاکستانی لشکر ءَ انگر کرتگ۔گْوستگیں ھپتگ ءِ تہ ءَ پاکستانی لشکر ءَ کم ءَ کم نو کس کشتگ ءُ دھاں زور بیگواہ کرتگ ، پاکستانی لشکر ءَ کرفیو ءِ میان ءَ بازار ءِ دکان پروشتگ اَنت ءُ دزی کرتگ۔
جارکش ءَ چد ءُ دیم گْوشتگ کہ زور گپتیں بلوچستان ءَ پاکستانی لشکر ءَ شھرمنندانی تر ءُ گرد ءِ آجوئی پل اتگ ءُ بلوچ سرڈگار سرپچیں زندانے جوڑ کرتگ۔نوشکے ھم چہ ھما ھنکینان اِنت کہ ماھانی ماہ اِنت پاکستانی لشکر ءَ ترندی ءَ انگر چتگ۔چہ ایشی ءَ نہ ایوک ءَ دمگ ءَ مردمانی ھم روچیگیں سرگرمی سانمند اَنت بلکیں سواری ءُ باربریانی روگ ءُ آیگ ھم بند اِنت ، دمگ ءَ درمان ءُ وراک ءُ وردن ءِ کمی اِنت ، چہ ایشی ءَ چہ درساں گیش چک ، پیریں مردم ءُ نادْراہ ناگیگ اَنت۔
درشان ءَ گْوشتگ بیتگ کہ پاکستانی لشکر ءَ کرفیو ءِ نیمون ءَ بازار ءَ دکانانی کبل پروشتگ اَنت ، لٹ ءُ پل کرتگ ءُ شھرمننداں مڈیانی تاوان داتگ۔مسافر ءُ باربری گاڑیانی شھر ءِ تہ ءَ پترگ ءُ درایگ ءِ سر ءَ پابندی جنگ بیتگ ، نادْراھاں نادْراھجاہ ءَ بروکیں ایمبولینس ھم دارگ بیگ ءَ اَنت۔اے ماں بلوچستان ءَ پاکستانی مھترھند ءِ مچکی ڈنڈ ءِ بدتریں رنگ اِنت ، کہ سرجمیں شھر ءُ بازار ءِ نندوک یک وڑ ءَ ایشی ءِ آماچ اَنت۔
بی این ایم ءِ جارکش ءَ گْوشتگ کہ پاکستانی لشکر بلوچ راجی زْرمبشت ءِ دیم ءَ بے سوب اِنت۔چہ بلوچ آجوئی ءِ زْرمبشت ءِ زور ءَ تکانسریں پاکستانی لشکر روانی تک ءَ پرشتگ ءُ بے واک اِنت۔ پہ وتی دم توسیں واک ءِ برجاھی ءَ زورگریں لشکر نی دروگ ءُ دْراش ءِ سر ءَ وت ءَ ھاٹیگ دیگ ءَ اِنت۔ شھرمننداں نشانگ کنگ ءُ ایشی ءَ بلوچ راجی زْرمبشت ءِ بگیری ءَ سوبمندی ءِ وڑ ءَ پیش دارگ ءَ اِنت۔
جارکش ءَ گْوشتگ کہ بلوچ راج ءَ اے زوراکیانی دیم ءَ گوں توانمندی ءَ اوشتگی اِنت۔ بلوچ راج الم ءَ آجو بیت ، ءُ اے وھدی پاکستانی لشکر ماں بلوچستان ءَ بے سوبی ءِ نزیک اِنت۔