بلوچ راجی زْرمبشت ( بی این ایم ) ءِ جارکش ءَ بلوچستان ءِ ھنکین سوراب ءِ ھند گدر ءِ سر ءَ پاکستانی بالی لشکر ءِ بمب گواری سھرائیں جنگے میارے لیک اتگ۔ میتگ ءِ سر ءَ جیٹ بالیگانی اے ارش ءَ چہ 20 ءَ گیش بے میاریں مردم مرتگ ایشانی تہ ءَ چہ 10 سال ءَ کستریں چک ھم گون اِنت ، اے شوپچ ءَ بلوچستان ءَ مردمی اگبال ءُ شھرمنندانی پھریزگ ءِ درگت ءَ سنگینیں جست ودی بیتگ۔
جارکش ءِ گْوشگ اِنت میتگانی سر ءَ بمب گواری ءُ بے میاریں چکانی کوش میان راجی مردمی راھبند ءُ جنیوا کنونشن ءِ پدریں بگیری یے۔ بلوچستان ءَ شھرمنندانی سر ءَ لشکری توان ءِ بے بند ءُ باریں کارمرد ، لوگانی ڈرینگ ءُ پہ زور لڈ ءُ بار کنائینگ رنگے کردگاراں ناں ایوک ءَ پاکستانی لشکر گون اِنت بلکیں گوں آئی ءَ ھم کاری کنوکیں کاسگ چٹیں بومی ئیں سیاستدان ءُ درسیں سیاسی گل ھم ھمایانی برابری ءَ اے میار ءِ تہ ءَ گون اَنت۔
بی این ایم ءَ یورپی سنت ءُ جھانی گلانی سر ءَ زور داتگ کہ آ اے مردمی شوپچ ءِ سر ءَ بے توار بیگ ءِ جاہ ءَ زیت ءُ سانمندیں گام بہ گیج اَنت۔گچینی یورپی سنت پاکستان ءِ جی ایس پی پلس بستار ءُ آئی ءَ دیگ بیتگیں آ دگہ گزرانکی لباں زیت ءَ زیت ماٹو بہ کنت ، پرچا کہ اے میان راجی آسراتی گوں اے ڈک ءَ بندوک اَنت کہ ڈیھ مردمی اگبالاں منگہ دے اَنت۔
جارکش ءَ گْوشتگ آئی ایس پی آر ءِ یک نیمگیں دروگ ءُ دراشیں درشاناں جاہ دیگ ءِ جاہ ءَ میان راجی رسانک ناپتیں وڑے ءَ راستی ءِ بنیاد ءَ احوالکاری بہ کنت۔میان راجی دزمانجنی ءُ جھانی اگبالانی گلانی ناپتیں وڑے ءََ پولکاری اے باریگ ءَ سکا سکا ھژدری اِنت ؛ اگاں میان راج ءَ زیت پدگوانک نہ دات گڑا چہ ایشی ءَ ناں ایوک ءَ یک نیمگے بلوچستان ءَ مردمی شوپچ گیش تر بیت بلکیں میان راجی تْرامگیجانی سر ءَ مردمانی باور ھم نزور بیت۔