بلوچ راجی زْرمبشت (بی این ایم) ءِ دری کارانی تک ءِ بولکے ءَ 23 اکتوبر 2026 ءَ دی ھیگ ءَ گوں یورپی پارلیمان ءِ باسکاں گندگ کرتگ۔ اے گندگ ءِ من ءُ مول جنوری 2027 ءَ بیوکیں چارگزار ءَ پیسر پاکستان ءِ جی ایس پی پلس باپاری بستار ءِ آسر کنگ ءِ رد ءَ کوشست ءُ کارانی تہ ءَ تیزی آرگ اَت۔ اے بولک بی این ایم دری کارانی تک ءِ جی ایس پی پلس گر ءُ داری پتر ءِ چیردستی ءَ کار کنگ ءَ اِنت۔
اے گند ءُ نند یورپی فیڈرلسٹسانی ( یو ای ایف ) ءِ مچی ءِ ماں نیدرلینڈز ءَ بیوکیں بنداتی مراگش ءِ میان ءَ بیتگ اَنت۔ اے مراگش دی ھیگ ءَ یوروپا ایکسپیرینس ءَ کنگ بیتگ اَنت۔ مراگش ءِ بنگپ اَت ’ جھانی ڈاہ کہ ما آیانی پجیگ ءَ دیمپان ایں۔‘
مراگش ءِ میان ءَ بی این ایم ءِ بولک ءَ یورپی پارلیمنٹ ءِ باسک اینا اسٹروئلنبرگ اور راکیل گارسیا ھرمیدا فان ڈیر وال ءِ پجیگ ءَ گوں ینگ یورپین فیڈرلسٹس (جے ای ایف) نیدرلینڈز ءِ کماش ایسٹر لائینز ءَ ھم گندک کرتگ۔
بولک ءَ یورپی جھگیر بلوچستان ءَ مردمی اگبالانی جاور، بلوچ راج ءِ آجوئی ءُ وتواجھی ءِ زْرمبشت ، ءُ پاکستان ءِ بے سوبی ءِ بارو ءَ دلجمی ءَ سرپدی دات اَنت کہ پاکستان مردمی اگبالانی رد ءَ وتی میانی راجی مسامانی پیلو کنگ ءَبے سوب بیتگ۔
اے گند ءُ نندانی بنگپ پاکستان ءِ جی ایس پی پلس بستار اَت۔ بولک ءَ چہ یورپی جھگیراں لوٹ کرت کہ آ اے گپ ءِ پلہ مرزی بہ کن اَنت کہ پاکستان ءَ رس اتگیں گچینی باپاری لب آسر کنگ بہ بہ اَنت۔ بولک ءِ دیدانک اَت کہ ھما ڈیھ کہ زور بیگواھی، در آمیدگسی کوش، مچکی ملام اور مردمی اگبال ءِ دگہ سکا مزنیں بگیریاں گون اَنت آ ابید چہ گر ءُ دار ءُ جست ءُ پرس ءَ باپاری تک ءَ سیت ءُ لب دیگ مہ بہ اَنت۔
بولک ءَ بلوچستان ءَ مردمی اگبال ءِ رد ءَ بے تاھیری ءُ گوں یورپی سنت ءِ جی ایس پی پلس اسکیم ءَ بندوکیں میان راجی مسامی پترانی گپانی نمنوگری ءِ گزارش نبشتھی دْروشم ءَ یورپی جھگیرانی دست ءَ دات اَنت۔
چہ گْوستگیں دو سالاں بی این ایم ءِ دری کارانی تک پاکستان ءَ رس اتگیں جی ایس پی پلس ءِ لباں جست ءُ گیر ءِ تہ ءَ آرگ ءَ شاھگانیں رنگے ءَ سفارتی مھیم ھلائینگ ءَ اِنت۔ گوں یورپی جھگیراں گندک، نبشتھی دْروشم ءَ مناک ءُ گواھی پیش کنگ ءُ یکشلیں سفارتی راھوتانی پارست ءَ بی این ایم ءَ ماں بلوچستان ءَ مردمی اگبالانی جاور ءِ سر ءَ یورپی شوندات ساچانی دلگوش گْور کنائینگ ءَ شریں وڑے ءَ دیمروئی کرتگ۔
جنوری 2027 ءَ پاکستان ءِ جی ایس پی پلس بستار ءِ چار ءُ گزار بیگی اِنت ءُ بی این ایم اے باریگ ءَ پہ وتی سفارتی کوشستاں سکا پر ارزشت لیک ایت۔ گل ءَ اوست اِنت کہ یورپی سنت ءِ ڈک ءُ بئیانی سر ءَ پاکستان ءِ گامگیجانی چار ءُ گزار ءِ وھد ءَ بی این ایم ءِ شوندات ، مناک ءُ پیش کرتگیں نبشتانکانی سر ءَ گوں سنگینی ءَ دلگوش دیگ بیت۔
بی این ایم ءِ دیدانک اِنت کہ یورپی سنت گوں مردمی اگبالانی راھبنداں وتی ھم گْرنچی ءَ برجاہ بہ دار ایت کہ آئی ءِ باپاری شونداتانی بنیاد اَنت۔کس باپاری لباں اسپر جوڑ مہ کنت ءُ مردمی اگبالانی سکا ٹوھیں بگیریانی سر ءَ چہ جست ءُ گیر ءَ آزاد مہ بیت۔
بی این ایم ءِ دری کارانی تک گوں یورپی تْرامگیج ءُ شوندات ساچاں وتی سفارتی راھوتاں برجاہ دار ایت ، پاکستان ءِ جی ایس پی پلس بستار ءِ آسر کنگ ءِ لوٹ کنت ءُ ایشی ءَ الم کنگ ءِ کوشست کنت کہ یورپی سنت ءِ باپار ءُ جست ء گیر ءِ نیادانی میان ءَ بلوچسان ءِ مردمی اگبالانی جاور مدامی گپ ءُ تْرانانی بھر بہ بیت۔