بلوچ راجی زْرمبشت ( بی این ایم ) ءَ بلوچستان ءَ مردمی اگبالانی بگیری ، زور بیگواھی ، در آمیدگسی کوش ءُ لشکرکشیانی بگیری ءَ ھینوور ءَ روانک ءُ جرمنی ءِ استان لوئر سیکسنی ءِ پارلیمان ءِ دیم ءَ زھرشانی کرتگ۔ زھرشانی کنوکاں چہ میان راج ءَ لوڑ کرتگ کہ اے ویلانی آزادیں رنگے ءَ پٹ ءُ پول کنگ ، ذمہ داراں جست کنگ ءُ پہ بلوچ راج ءِ وتواجھی ءِ اگبال ءَ مادنیں گام گیجگ بہ بیت۔
گوں زھرشانی مچی ءَ تْران کنان بی این ایم ءِ باسک آصف، عاقب ، پشتون پانک زْرمبشت ( پی ٹی ایم ) ءِ جھگیر سعید مومند ، فضل مینہ خیل ءَ تْران کرتگ۔ آیاں زور بیگواھی ، ناراھیں دزگیری ، آزار دئی ءُ شھرمنندانی کوشانی سر ءَ گپ جنان ءَ گْوشتگ کہ بلوچ ءُ پشتون راج ءِ میان ءَ ھم سنتی ءُ گامگیجی ھمکاری ھژدری اِنت۔
گپ جنوکاں پنجگور ءَ اگست 2026 ءِ میان ءَ پیر جان ، شعیب ، حافظ مدثر ، وزیر احمد ءُ جاسم ءِ کوش ءِ درگت ءَ پانک ءِ گزارشانی درور دیان ءَ شھرمنندانی پھریزگ ، لشکری بالیگ ءُ ڈرون ارشاں مردمانی بیرانیانی آزادیں رنگے ءَ پٹ ءُ پول کنگ ءِ لوٹ کرتگ۔آیاں چہ راجانی سنت ءُ جھانی تک ءِ مردمی اگبالانی گلاں لوٹ اتگ کہ آ اے بگیریانی سر ءَ دلگوش گْور بہ کن اَنت ءُ اے کارانی کنوکاں جست بہ کن اَنت۔
بی این ایم ءَ وتی دیدانک ءِ رد ءَ درائینتگ کہ بلوچ راج ءَ آجوئی ءُ وتی سیاسی باندات ءِ شور کنگ ءِ اگبال ھست ، ءُ بلوچستان ءِ جیڑہ زور ءِ جاہ ءَ گوں پھازگ ، مزدانک ءُ وتواجھی ءِ اگبال ءِ منگ ءَ گیشینگ بہ بیت۔
روانک چہ شھر ءِ بنجاھی ھند کروپکے ءَ بندات بوت ءُ بھر زیروک جتائیں دگاں گْوزان پارلیمان ءِ دیم ءَ مچ بوت اَنت ، آیاں اوگام جت ءُ پہ مردمانی سرپد کنگ ءَ پنتاک شنگ کرت ، داں آیاں بلوچستان ءِ جاورانی بارہ ءَ سھی بہ کن اَنت۔