بلوچ راجی زْرمبشت ( بی این ایم ) ءِ جھدکاراں جرمنی ءِ شھر ٹریئر ءَ آگاھی مھمے برجم داشتگ ، ایشی ءِ مول بلوچستان ءَ پاکستانی لشکر ءِ دست ءَ زور بیگواھی ، ’’ کشگ ءُ چگل دیگ ‘‘ ءِ شوندات ءِ رد ءَ در آمیدگسی کوش ءُ مردماں پہ زور چہ وتی گساں در کنگ ءِ نیمگ ءَ یورپ ءِ دلگوش گْور کنائینگ اَت۔ بھر زیروکاں زور بیگواھیں مردمانی عکس گون بیتگ اَنت ، پنتاک بھر کرتگ ءُ راہ گْوزی مردم بلوچستان ءِ جاور ءِ بارہ ءَ سھی کرتگ اَنت۔
اے زھرشانی ءَ حبیب ، آصف ، مجیب عبداللہ ءُ محسن ءَ گپ جتگ۔
گْوشتانک دیوکاں گْوشتگ کہ بلوچ سرڈگار ءُ مڈیانی بارہ ءَ شور ابید چہ ھما ھند ءِ مردمانی منگ ءُ وشی ءَ کنگ بہ اَنت۔ آیاں جست کرتگ ، اے چونیں دیمروئی اِنت کہ مردماں چہ وتی لوگاں درکنت ، ءُ چہ ایشی ءَ سیت کئے ءَ رس ایت ، باریں ؟
گْوشتانک دیوکاں گْوشتگ کہ بلوچ نودربر ، سیاسی جھدکار ءُ تاکار زور بیگواھی ءُ در آمیدگسی کوش ءِ دیمپان اَنت۔ آیاں گْوشتگ کہ مردمی اگبالانی تْرامگیجانی گزارش ءِ رد ءَ جولائی 2026 ءَ 105 کس زور بیگواہ ءُ 59 کس کشگ بیتگ اَنت ، ءُ لوٹ کرتگ کہ اے ویلانی آزادیں رنگے ءَ پٹ ءُ پول کنگ بہ بیت۔
گْوشتانک دیوکاں چد ءُ دیم گْوشتگ کہ ھالانی رد ءَ شور پارود ءِ نزیک ء 30 ھزار جاھمننداں گْوشگ بیتگ کہ آ چہ 30 اکتوبر 2026 ءَ پیسر وتی لوگاں یلہ بہ دے اَنت۔ چہ پشتاں آ اود ءَ نندوکیں کھول در کنگ ، رمبینگ ءُ گدانانی نیمگ ءَ برگ بیگ ءَ اَنت۔
بی این ایم ءَ راجانی سنت ، یورپی سنت ءُ میان راج ءَ لوٹ کرتگ کہ آ اے مردمی اگبالانی بگیریانی پٹ ءُ پول بہ کن اَنت ، پاکستان ءَ جست ءُ پرس بہ کن اَنت ءُ شور پارود ءَ ھوار چہ بلوچستان ءِ آ دگہ دمگاں مردماں زور چہ آیانی لوگاں در کنگ ءِ دیم ءِ دارگ ءَ زیت ءُ سانمندیں گامگیج بہ زیر اَنت۔