بلوچ راجی زْرمبشت ( بی این ایم ) ءِ جارکش ءَ بلوچ راجدوستیں راھشون بابا خیربخش مری ءِ دوازدھمی سالروچ ءِ درگت ءَ آئی ءِ کرد ءُ کار گیر آرتگ اَنت ءُ گْوشتگ بابا خیربخش مری ، بلوچ آجوئی ءِ زْرمبشت ءِ انچیں راھشونے کہ آئی ءَ گسر بیتگیں بلوچ زْرمبشت آجوئی ءِ راہ ءَ پرینت ءُ آئی ءِ بنیاد پھتو کرت اَنت۔ بلوچ راجی زْرمبشت ( بی این ایم ) آئی ءِ سسا ءَ راجی مڈی لیک ایت ؛ آئی ءَ بلوچ راج مانشت ءِ راہ پیش داشت ءُ منزل ڈس اِت۔ آئی ءِ راھشونی ءُ دیمونیانی برورد ءَ مروچی لکاں بلوچ آجوئی ءِ زْرمبشت ءِ بھر اِنت۔
آئی ءَ گْوشتگ بابا خیربخش مری ایوک ءَ ٹکے ءِ سردار ءُ سیاسی راھشونے نہ اَت بلکیں آشوبی ءُ راجدوستیں شھزانتے اَت۔ آئی ءَ بلوچ چاگرد ، دمگ ءُ جھانی جاور ءُ سیاست ھیرتی ءَ سیل کرت اَنت ءُ ھمے آسر ءَ سر بوت کہ پاکستان ءِ بست ءُ بند ءِ تہ ءَ بلوچ راجی پجار پھریز نہ بیت۔ آئی ءَ چہ وتی ءُ بلوچ راج ءِ یکشلیں بے سوبیں کتہ کاریاں ھمے در برت کہ پاکستانی پارلیمنٹ ءَ راجی وتواجھی ءِ گرگ وتی جاہ ءَ ، نل ءُ نالی ءُ بنکی شھری اگبال ھم گرگ نہ بی اَنت۔واجہ ءِ ھمے تچکیں دید ءَ ماں بلوچستان ءَ درپارلیمانی راجی سیاست ءِ مگیم کنگ ءَ بنکی کردے پیلو کرت۔
جارکش ءَ گْوشت آئی ءَ سرداری تْرام کْوھنگ ءُ پندمنتگ لیک اِت۔ آ پہ بلوچ راج ءَ دیمروئی پسند ءُ نوکیں مھترھندے ءِ لوٹوک اَت کہ آ اود ءَ درساں آجوئی ، برابری ءُ مزدانک بہ رس ایت۔ آ ناں ایوک ءَ بلوچستان ءِ تہ ءَ سیاسی ، چاگردی ءُ گزرانکی بالادستی ءِ نمنوک اَت بلکیں میان راجی واکانی بالادستیں شونداتانی ھم تچکیں زبان ءَ بگیری کنوک اَت۔
’’ آئی ءَ درانڈیھی سگ اِت، چہ پشتپدی رس اتگیں ٹکی واک ، میرات ءُ لب مان نے آرت اَنت ءُ بلوچ آجوئی ءِ زْرمبشت ءِ بنپد پزور کرت اَنت۔ آئی ءَ وتی اوبادگانی پجیگ ءَ وتی درسیں چیز پہ بلوچ ءِ مانشت ءُ پہ آجوئی ءِ زْرمبشت ءَ نْدر کرت اَنت ءُ سرنہ چنڈیں کوھے ءِ پیم ءَ وتی دید ءِ سر ءَ داں گڈی دم ءَ برجاہ بوت۔آئی ءَ بلوچ راج سوج ءُ سکین دات کہ نوکیں زمانگ ءِ لوٹانی رد ءَ وت ءَ لیکھی ءُ جنگی بنیاد ءَ بہ تْرام ایت ءُ ھمے رد ءُ دْروشم ءَ جھد بہ کنت۔ آئی ءِ ’ حق توار ‘ ءِ نام ءَ آگھی نیاداں بلوچستان ءِ چاریں پھناتاں جیڑگ ءُ سسا ءُ زانشت ءُ گامگیج ءِ سھرکپ روک کرت ، چہ ایشی ءَ بلوچ راج ءَ وتی منزل دیست۔‘‘
جارکش ءَ گْوشتگ بابا خیربخش مری ءِ کارست ءُ کردار مارا اوپار ، زانتکاری ءُ سانمندیں شونداتانی درونت دے اَنت۔ آئی ءَ جل ءُ جوش جنگ ، چہ زمینی راستی ءَ ڈنی سیاست ، ھورکیں گپ ءُ پیتاریانی سر ءَ باور نہ داشتگ اَت۔ آئی ءَ مارا سوج دات کہ سانمند ءُ گامگیجی سیاست ھچ وڑیں درشان ءُ رسانکی ریس ءُ پریس ءِ وازمند نہ بیت ءُ ابید چہ گامگیج ءَ ایوک ءَ گوں اوگام جنگ ءَ زْرمبشت ھلائینگ نہ بی اَنت۔آئی ءِ ھمے سسا ءَ بلوچ ءِ گھگیری سیاست تج اِت کہ مروچی توانمندتریں رنگے ءَ برجاہ اِنت۔