بلوچ راجی زْرمبشت ( بی این ایم ) ءِ جارکش ءَ ڈاکٹر ماہ رنگ ءُ آئی ءِ ھمراھانی نمائشی آمیدگس ءِ پارست ءَ سزا دیگ ءِ مھترھندی کوشستانی سر ءَ بے تاھیری درشانتگ ۔ آئی ءَ وتی درشانے ءَ گْوشتگ بلوچ یکجھتی پتر ( بی وائی سی ) ءِ زندانی ئیں راھشون ڈاکٹر ماہ رنگ ءُ آئی ءِ ھمراھاں پاکستان نمائشی آمیدگس ءِ پارست ءَ سزا دیگ ءِ کوشست کنگ ءَ اِنت۔ پاکستان ءِ آمیدگس ھم پاکستانی لشکر ءِ دست ءِ لیبوک اَنت۔ماہ رنگ ءُ آئی ءِ ھمراھانی کیس ماں ھدا جیل ( شال ) ءَ برجاھیں ناراھیں ’ فیس لیس کورٹ ‘ بزاں کور چھرگیں آمیدگس ءِ پارست ءَ گوش دارگ بیگ ءَ اَنت ، اے آمیدگس ءِ نام ءَ مھترھند ءِ گوں مردماں سکا بدڈولیں ملنڈے۔
جارکش ءَ اے رد ءَ درائینتگ بلوچستان ءَ مردمی اگبالانی سرسبزینگ ءِ لوٹ ءِ سر ءَ بلوچ یکجھتی پتر ءِ راھشون ڈاکٹر ماہ رنگ ، صبغت اللہ ، بیبگر ، بیبو ءُ گلزادی ءِ سر ءَ 51 دروگیں کیس جوڑ کنگ بیتگ ، کہ آیانی پرایمنیں سیاسی سرگرمی ءُ گپ ءُ تْران کنگ ءِ سر ءَ بندش جنگ ءِ کوشست اَنت۔ اے راھشون 22 مارچ 2025 ءَ دزگیر کنگ بیتگ اَنت ءُ مروچی ( 14 جون ) ءَ آیاں ماں زندان ءَ سالے ، دو ماہ ءُ 23 روچ سرجم اِنت۔ اے دزگیری چہ بلوچ راجی اگبالاں پاکستانی مھترھند ءِ یکشلیں انکار ءُ زوراکیانی دْرچ ءِ بھر اَنت۔ بلوچ سیاسی کارکناں بدتریں جاور ءُ مھترھند ءِ یکشلیں زوراکیاں پد ھم پرایمن ءُ سیاسی راہ گچینتگ ، بلے مھترھند وتی زوراکیں تْرام ءِ برپشت ءَ درسیں تْرامگیجاں بلوچ راج ءِ سیاسی توار ءِ نگٹ کنگ ءَ کارمرد کنگ ءَ اِنت۔
بی این ایم ءِ جارکش ءَ چد ءُ دیم گْوشتگ ماں جھان ءَ آمیدگس مزدانک ءِ برجاھی ، دلجمی ءُ چہ زوراکانی نیمگ ءَ راھبندانی ناراھیں کارمرد ءِ دارگ ءَ جوڑ کنگ بی اَنت۔ بلے پاکستان ءَ مزدانک ءِ نام ءَ ’ کورچھرگیں آمیدگس ‘ جوڑ کرتگ ءُ گوں راھبند ءُ مردماں ملنڈ کنگ ءَ اِنت۔ اے سیاھیں راھبند ءِ رد ءَ ھمایانی سر ءَ کہ بھتام جنگ بیت چہ آیاں آمیدکار ، وکیل ، گواہ ءُ داں پٹ ءُ پول کنوکیں سروگانانی نام ءُ پجار ھم چیر دیگ بی اَنت۔ اے ناراھیں کارپد ءِ بگیری ءَ ڈاکٹر ماہ رنگ ءُ آئی ءِ ھمراہ ءُ وکیلانی زھرشانی پہ راست ءُ راہ اِنت ۔ میان راجی تْرامگیج باید پاکستانی واکداراں بہ دار اَنت کہ مھترھندی تْرامگیجاں زوراکی ءِ ابزارانی رنگ ءَ کارمرد مہ کن اَنت۔ بی وائی سی ءِ زندانی ئیں راھشون ناشرکار نہ اَنت بلکیں پرایمنیں سیاسی کارکن اَنت ، کہ پاکستانی مھترھند آیاں ناراھی ءُ نامزدانکی ءِ نشانگ کنگ ءَ اِنت ءُ چہ آیاں بیرگرگ ءَ اِنت۔
آئی ءَ وتی درشان ءِ گڈ سر ءَ گْوشتگ بلوچ راج ءِ گْور ءَ پاکستان ءَ تشے ھم مھترھندی بستار نیست ۔ مارا آمیدگسانی پجیگ ءَ چہ پاکستان ءِ ھچ رنگیں تْرامگیجاں ھچ وڑیں اوست نیست ، پرچا کہ بلوچستان ءَ درسیں تْرامگیج پاکستانی لشکر ءِ چیردست اَنت ءُ ھمایانی گْوشگ ءِ سر ءَ کار کن اَنت۔ مھترھندی شونداتانی تہ ءَ ھچ رنگیں گڑ ءُ منج پشت نہ کپتگ ، تچک اِنت کہ پاکستان بلوچ راج ءَ چکچین کنگ ءَ اِنت۔ مارا ترس اِنت گوں ڈاکٹر ماہ رنگ ءَ ھم ھما رنگیں درانسانی کردگار کنگ بیت کہ گْوست ءَ گوں دگہ بلوچ راھشوناں بیتگ۔ ڈاکٹر ماہ رنگ ءُ آئی ءِ ھمراھانی سیاسی ءُ مردمی اگبالانی پھریزگ ءُ ماں بلوچستان ءَ مردمی اگبالانی سرسبزینگ ءَ بلوچ راج چہ میان راج ءَ زیت ءُ پرسانیں دزمانجنی ءِ لوٹ کنت۔
