Live: the latest updates

بلوچ نیشنل موومنٹ (بی این ایم) نا چیئرمین ڈاکٹر نسیم بلوچ ورلڈ سندھی کانگریس نا 38 میکو سندھ انٹرنیشنل کانفرنس آن تران کرسہ پارے کہ بلوچ و سندھی قوم آتیکن قومی آجوئی، جمہوریت امن و پائیدار انگا مستقبل نا دوئی کننگ اسٹ ایلو تو سوگو او تعلقداری ئس تِخِک۔ انتئے کہ قومی آجوئی آن بیدس جمہوریت، امن و پائیدار انگا مستقبل بیرہ زیبا او لوز آتا و است ئے ریفوکو تغ جوڑ مریرہ۔

او پارے کہ او بلوچ نیشنل موومنٹ نا چیئرمین نا حیثیت ئٹ کانفرنس آن تران کننگ ءِ، ولے سندھ ئنا بندغ آتا نیام ئٹی مننگ آن دا احساس مفک کہ او پین قوم ئسینا نیام ئٹی سلوک ءِ۔ سندھ و بلوچستان بیرہ اِرا ہمسایہ او ڈغار افس بلکن سد آ سال آتیان ثقافتی، بندغی، کاروباری و سیاسی سیالی تیٹی گھنڈوک ءُ۔ دافتا سیم، تہذیبی آ یاد آک، تاریخی آ تجربہ آک و ساڑی آ وخت ئنا جیڑہ غاک تین پہ تین تو گھنڈوک ءُ۔

او پارے کہ اگہ قومی آجوئی پاش ءُ سیاسی جدوجہد، مستقل مزاجی و قربانی تیان بیدس دوئی کننگ مروس تو دنیا نا دیہاڑ ئٹی لکھ آتا کچ بندغ آتے تینا جان تے ندر کروئی تمتوکہ۔ قومی آجوئی بیرہ اسہ نعرہ ئس افک بلکن مُرغُن آ سیاسی جدوجہد، پاش انگا مسخت و بے کچ آ قربانی تا بھرم ءِ۔ بلوچ و سندھی ڈغار تیا برجاء انگا لٹ و پل و قوضہ نا تسلسل نہ بیرہ دا قوم آتا چائند بلکن اوفتا بروکا وخت ئکن ہم خطرہ ءِ۔ انتئے کہ اوفتیکن ڈغار نا سوال بیرہ ڈغار نا اف بلکن قومی وجود، چائند و بروکا نسل آتا بقاء ءِ۔

ڈاکٹر نسیم بلوچ پارے کہ بلوچ و سندھی قیادت ئے تینا قومی آ چائند، سیاسی تنظیم و جتا جتا آ خواست آتا قدر ئے کرسہ بندغی حق، زوراکی ئٹ بیگواہی، سیاسی قیدی ، قدرتی مڈی و جہانی پڑ آتیا بھلنی و ایلو بشخ آتیٹی اواری ئٹ جدوجہد کروئی ءِ، کمک کننگ نا بنیات آ جزباتی نعرہ تا جہہ آ اسٹ ایلو نا قدر و برابری مروئی ءِ۔ حقیت ئٹ اواری ہندادے کہ ارٹ انگا قوم آک تینا چائند و خواست آتے مونا تخِسہ مشترکہ جیڑہ غاتے ایسر کننگ کن اسٹ ایلو نا رئی آ سلیر و ہمدڑدی ئے عملی اواری ئٹ بدل کروئی ءِ۔

ڈاکٹر نسیم بلوچ پارے کہ دیہاڑ بلوچ و سندھی قوم ئے بھاز ٹپی کرینے، ولے تاریخ موقع ہم ایتک، و دا تومکا قوم آتا مون آ تینا قومی ریاست و سیاسی نظام آتے بنیات آن جوڑ کننگ نا جوانو موقع ئس ساڑی ارے۔ ضرورت ہندا گڑا نا ءِ کہ دانہ دانہ آ صلاحیت آتے اسٹ ایلو نا تجربہ تیان فائدہ ہرفِسہ سوگو آ سیاسی و سفارتی قوت آتیٹی بدل کیر۔

او بلوچ و سندھی قوم آتا نیام ئٹ اواری نا درشانی ئے کرسہ پارے کہ ہراڑے ہم نم ننے توار ایتورے سیاسی اسٹیج آن ہلیس مشکل انگا محاذ اسکان نم بلوچ ئے تینتو ہم کوپہ خنورے۔

بلوچ نیشنل موومنٹ (بی این ایم) نا بندغی حق آتا ادارہ پانک جنوری 2026 نا رپورٹ ئے شنگ کرینے، ہراٹی پاننگانے کہ سال 2026 نا بناء ہم بلوچستان ئٹی بندغی حق آتا لتاڑینگ ئٹ کننگا۔ رپورٹ نا رد ئٹ بلوچستان نا جتا ضلع تیتو اوار کراچی ٹی ہم وے عدالت آن کوش ئنا منہ تدینی رپورٹ کننگار۔ مُچی وڑ ئٹ 82 بندغ نا زوراکی ئٹ بیگواہی نا کیس آک رپورٹ مسُر۔ ہندا وڑ 44 بندغ ئے بدنی و ذہنی زوراکی آن پد یلہ کننگا۔ دا وخت وے عدالت آن کھسفنگ نا 12 تدینی مونا بس، ہراڑان بلوچستان ئٹ خُلیس و بے یخینی نا فضا گیشتر پینگُن مس۔

وے عدالت آن کھسفنگوک آتیٹی محمد انور، راھی عصا، ایاز ولد دوست محمد، ظریف ولد فقیر محمد، ظریف ولد محمد یعقوب، بالاچ ولد حامد، ذوہیب احمد، ملا رزاق، عبدالمطلب، نعمان حیدر، طاہر بلوچ و ملنگ ولد زاہد ندیم اوار ءُ۔ محمد انور “دوکی” نا تولوک ئے جون 2025 ئٹ بیگواہ کننگا و جنوری 2026 ئٹی اونا جون دوکی آن خننگا۔ چنک سن آ راھی عصاء ئے دے نیمروچ آ ھوشاب بازار ئٹی سمکاری کرسہ کھسفنگا۔ ایاز ‘گیشکور’ نا ہندی و ظریف ولد فقیر محمد ‘سیاہ کل مالار آواران ‘ نا ہندی نا جونک آواران نا علاقہ نوندڑہ آن خننگار۔ بالاچ تسپ پنجگور نا ہندی ئے تسپ بازار ئٹی سمکاری کارسہ کھسفنگا۔ ظریف ولد محمد یعقوب ریکی چاہ کولواہ آواران نا ہندی ئے بیگواہ کننگ نا اِرا ساہت آن پد کھسفنگا۔ ذوہیب احمد ئے پنجگور ئٹی بیگواہ کننگ آن پد کھسفنگا۔ ملا رزاق نوانو زامران نا ہندی نا جون سیمسوری کور آن خننگا۔ عبدالمطلب کلی کمالو سریاب شال ئنا ہندی ئے 11 جولائی 2025 آ اونا اُراغان دزگیر کننگ آن پد بیگواہ کننگا و 19 جنوری 2026 آ دشت مستونگ ئٹی دروغ ئنا مونتس ئٹی کھسفنگا۔ نعمان حیدر ئے 19 نومبر 2025 آ مند کیچ آن دزگیر کننگا و 21 جنوری 2026 آ اونا جون تمپ آن خننگا۔ 21 سالی آ مزور طاہر بلوچ ئے 21 جنوری 2026 آ کوشکلات تمپ ئٹی سمکاری کرسہ کھسفنگا۔ ہندن 20 سالی آ ملنگ ولد زاہد ندیم ئے دزگیر کننگ آن پد کھسفنگا۔

ضلع تا حساب ئٹ کیچ ئٹ 26، شال ئٹ 16، گوادر ئٹ 15، خاران ئٹ 9، پنجگور 6، خضدار ئٹ 4، لسبیلہ ئٹ 2، کراچی ئٹ 2 ہندن ڈیرہ بگٹی و نوشکے ٹی اسہ اسہ کیس رپورٹ مسُر۔ منہ تدینی تیٹی اُرا تیا چھاپہ ، بیدس وارنٹ آن دزگیری و نادرست جہہ تیا زندان تیئٹ لٹ ئہ کٹ نا دوبہ مونا بسُنے۔

پانک نا رد ئٹ دا حالیت آک بلوچستان ئٹی بندغی حق آتا گیشتر خراب مروکا حالت نا درشانی ئے کیرہ، بیان ئٹ پاننگانے کہ زوراکی ئٹ بیگواہی و وے قانود آن کھسفنگ نا چرجوئی اسہ وے نوشتہ مروکو قانود ئسینا دروشم ئٹ مونا بسُنے، ہرانا ایسری کن صاف و آزات پٹ ئہ پول ، ذمہ وار آتا نشاندہی و احتساب المی ءِ، تانکہ زیمی مروکا خاہوت آتے انصاف تننگ مرے و بلوچستان ئٹ قانود نا بھلنی ئے یخینی جوڑ کننگ مرے۔