چہ بلوچ راجی زْرمبشت ( بی این ایم ) ءِ نیمگ ءَ شھمیر ڈاکٹر منان ءُ ھمراھانی شھمیری روچ ءَ نیادے برجم دارگ بیتگ ، ماں اے نیاد ءَ بی این ایم آواران ھنکین ءِ باسکاں بھر زرتگ۔ نیاد ءَ بی این ایم ءِ کستریں کمک سرکماش استاد بابل لطیف ، بنجاھی پتر ءِ باسک چیف اسلم ، آواران ھنکین ءِ کمک کماش تلار ناز ءُ زبیر ءَ تْران کرتگ۔
زانگ بہ بیت 31 جنوری 2016 ءَ مستونگ ءِ کلی دتو ءَ پاکستانی لشکر ءِ بیڑ ءَ شھید ڈاکٹر منان گوں وتی ھمراہ بابو نوروز ، حنیف ، اشرف ءُ ساجد ءَ شھمیر بوت۔ شھمیر ڈاکٹر منان بی این ایم ءِ سرکارگشاد اَت۔
تْرانکاراں وتی گپانی تہ ءَ گْوشتگ شھمیر ڈاکٹر منان راھشونے ءَ ابید راجی طبیبے اَت ھم۔ آئی ءَ بلوچستان ءِ ھمک ھلک ءُ میتگ زانتگ اَنت۔ءُ ناگیگیں جاورانی تہ ءَ ھم پارٹی ءِ مگیم کنگ ءَ شپ ءُ روچ نہ چار اِت۔کسے ءَ کجام ھم جاھے توار بہ جتیں آئی ءَ پہ گل ءِ کاراں وت ءَ سر کرت۔
آیاں شھمیر ڈاکٹر منان ءِ سیاسی سنچ ءُ بودشتانی سر ءَ گپ جنان ءَ گْوشتگ شھمیر ڈاکٹر منان ءَ سنگتانی کار مدام شرگداری نگاہ ءَ چار اِت اَنت۔اگاں جاھے نزوری یے دیست تچک ءَ گْوشت ئِے۔ آئی ءِ نز ءَ شرگداری پہ راجداری ءِ آمید کنگ ءَ المی اَت ،نے کہ آ شرگداری ءَ کینگ سرپد اَت۔ آئی ءَ ھمے لوٹ اِت کہ مئے نزوریانی سان مئے گل ءُ زْرمبشت ءِ سر ءَ مہ کپ اَنت۔
’’ شھمیر ڈاکٹر منان ءِ شھمیری ءَ مزنیں جاھے ھورک اِنت بلے چہ آئی ءِ دیمونیاں گل مگیم ءُ توانمند ھم بیتگ۔ آئی ءَ ھمے گواچن کرت کہ مستریں توان نامدار بیگ نہ اِنت بلکیں گوں وتی مول ءَ وفادار بیگ اِنت۔ ‘‘
تْرانکاراں دیمتر ءَ گْوشتگ ڈاکٹر منان ءَ گوں وانگ ءُ زانگ ءُ کتاباں مزنیں دوستی یے ھست اَت۔ شھید منان جان ءَ سنگتاں مدام کتاب وانگ ءِ سکین دات ءُ گوشت کہ گوں کتاباں سنگتی بہ کن اِت کتاب شمئے دیمروئی ءِ مانزمان اَنت۔ آئی ءَ سنگتاں مدام کتاب وانگ ءِ سکین دات ءُ وت ھم کتاب ئِے ونت۔آ گوں سیاسی کاراں مدام دزگٹ اَت۔ حال ئِے گوش داشت ءُ وتی گْور ءَ یاداشت ئِے نبشت داں بلوچستان ، دمگ ءُ جھان ءِ جاوراں شریں وڑے سرپد ءُ آگاہ بہ بیت۔
آیاں گْوشتگ کہ ڈاکٹر منان چہ اگدہ دار بیگ ءَ پیش ھم راھشونے ءِ بستار ءَ کار ءَ اَت۔ آ بلوچ راج ءِ پرزوریں توارے اَت ۔ آئی ءَ بلوچ راجی زْرمبشت ( بی این ایم ) ءِ تلو ءِ سر ءَ بلوچ راج یکجاہ کرت۔ آئی ءَ زانت ، سسا ءُ سکین دات داں پاکستان ءِ زوراکی ءُ چیردستی ءِ بگیری ءَ گھگیری بہ کنت۔ پاکستان ءَ آ پمیشکا نشانگ کرت داں آئی ءِ سیاسی کارانی دیم ءَ بہ گپت۔
آیاں وتی گپانی تہ ءَ درائینتگ ، پاکستانی سرکار بلکیں ھمے سرپد بیت کہ آ راجی سراں شھمیر کنت ءُ بلوچ ءِ زْرمبشت ءِ اوشت ایت یا آسر بیت ، چوش نہ اِنت بلکیں شھمیرانی دیمونی بلوچ ءِ پدریچ ءَ گیشتر ، آگاہ ءُ سوگہ کن اَنت ءُ بلوچ روچے ناں روچے وتی آزادی ءَ الم گپت۔
