بلوچ راجی زْرمبشت ( بی این ایم ) ءِ سرکارگشاد دل مراد ءَ گْوشتگ ڈاکٹر منان ، بابو نوروز ، اشرف ، حنیف ءُ ساجد ءِ شھمیری ءَ پد ھما ھورکی یے است ، آ بھ پر نہ بیت۔ اے مزنیں راھشون ءُ باسکانی دیمونی بلوچ گْوستانک ءِ ھما درپشناکیں درے کہ مدام یات کنگ بیت۔
اے گپ آئی ءَ ماں نیدرلینڈز ءَ بیتگیں بی این ایم ءِ مراگشے ءَ گْوشتگ اَنت۔
آئی ءَ گْْوشتگ شھمیر بابو نوروز زانتکار ، سرپد ءُ ٹوھیں لیکھی مردمے اَت ، بابو نوروز رنگیں ھمبل سدھکاں ودی بیت۔آئی ءِ سنچ ، جھد ءُ دیمونیاں بلوچ زْرمبشت جھلانکیں سسا ءُ لیکوی مزرویے دات ۔اے رنگیں مزنیں شھمیرانی کمی ناں ایوک ءَ پہ زْرمبشت بلکیں پہ سرجمیں راج ءَ انچیں تاوانے کہ بھ پر نہ بیت۔ بلے آیانی کار ، سسا ءُ جھد پہ آیوکیں پدریچ ءَ چیدگ ءِ رنگ ءَ مان اَنت۔
آئی ءَ گْوشتگ مروچی ما اد ءَ یکجاہ این ءُ بلوچ راجی زْرمبشت ءِ تہ ءَ پرکار ایں ، اے درس ڈاکٹر منان ءِ دیمونیانی دْرچ اِنت۔آئی ءَ گْوشتگ اگاں گْرانیں باریگ ءَ مارا سسا ، توان ، ھاٹیگ ءُ داشت ھست اَت ، آ ڈاکٹر منان ءِ راھشونی ، سسا ءُ جھد ءِ برورد اَت۔ڈاکٹرمنان ءَ ناں ایوک ءَ مارا سنچ دات بلکیں دیمونی ءِ انچیں درورے اشت کہ مروچی ھم پہ بلوچ راج ءَ چیدگے۔
آئی ءَ گْوشتگ ڈاکٹر منان ءِ شپ ءُ روچ ءِ کار ، یکشلیں جھد ءُ کوشستانی برورد ءَ مروچیی بی این ایم راج ءِ دیم ءَ مگیم ءُ مزنیں سیاسی گلے ءِ بستار ءَ ھست اِنت۔ آئی ءَ گْوشتگ کہ ڈاکٹر منان ءِ دیمونی ءُ راھشونی بی این ایم ءِ بنیاد اَنت ، ھمیشانی برورد ءَ اے گل مروچی ھم وتی لیکھانی سر ءَ اوشتاتگ ۔
آئی ءَ گْوشتگ ڈاکٹر منان جان انچیں دردوار ءُ دیرچاریں کارستے اَت کہ آئی ءِ سرجمیں زند ءِ راجداری پہ سنچ ءِ ردوم ، بلوچ چاگرد ءِ سسائی ساچ ءُ سیاسی باسکانی لیکھی ءُ ماں کار پڑ ءَ آیانی سر ءُ سوج ءَ نْدر اَت۔ آئی ءِ رد ءَ مردم راجداری تک ءَ ایوک ءَ سیل چاروک نہ اَنت بلکیں اے پڑ ءِ پرکاریں کارست اَنت۔ پمیشکا آئی ءَ مردمانی تہ ءَ باور ، توان ءُ سنچ ودی کنگ ءِ سر ءَ گچینی دلگوش دات۔ پہ راجداریں باسکاں آ ایوک ءَ راھشونے نہ اَنت بلکیں استادیے اَت کہ گْرانیں جاوراں ھم داشت ، راھبندانی منوگری ءُ جھد ءِ سکین ئِے دات۔آئی ءِ زند ءِ مول ، کار ءُ یکشلیں جھد ءِ رژنائیں درورے اَت۔
نی اے مئے زمہ واری اِنت کہ ما ڈاکٹر منان ءُ آئی ءِ ھمراھانی کاراں گوں پاک کردی ، سسائی پھتوئی ءُ گوں مگیمیں ھاٹیگ ءَ دیم ءَ بہ بر ایں۔ ما آیانی جھد ، دیمونی ءُ لیکھاں وتی زند ءِ کارانی بھر بہ کن این ءُ بلوچ راجی زْرمبشت ءَ گوں ھمے سنچ ، تْرام کاری ، اوپار ءُ داشت ءَ برجاہ بہ دار ایں کہ آئی ءَ ایشانی بن ھشت ایر کرتگ۔ اے پہ ھمے مزنیں راھشون ءُ شھمیراں راستیں رنگے ءَ ستک شانی اِنت ءُ ھمے مئے زمہ واری اِنت۔
