بلوچ راجی زْرمبشت ( بی این ایم ) ءِ جارکش ءَ ماں اوگانستان ءِ سر ءَ پاکستان ءِ ارش ایر جتگ اَنت ءُ گْوشتگ پاکستان ءَ 21 ءُ 22 فروری ءِ میانی شپ ءَ اوگانستان ءِ میتگانی سر ءَ ارش کرتگ ، چہ ایشی ءَ چکانی پجیگ ءَ سرجمیں کھول کشگ بیتگ اَنت۔بلوچ راج گوں سانمند بیتگیں کھولاں ھمدردی درشان ایت۔ ما اوگانستان ءِ وتواکی ءُ آئی ءِ وتی سرزمین ءِ دیمپانی کنگ ءِ اگبال ءِ سرجمی ءَ پلہ مرزی کن ایں۔
آئی ءَ گْوشتگ اوگانستان ءِ سر ءَ پاکستان ءِ ارش اوگان راج ءِ وتکواکی ، برجاھی ءُ آجوئی ءِ سر ءَ تچکے ءَ ارش اَنت ، کہ ایشانی تہ ءَ دست گوشیں شھرمنند نشانگ کنگ بیتگ اَنت۔ زمینی راستی پاکستان ءِ گپاں رد کن اَنت۔اے بالی ارشانی تہ ءَ پیسرگیں پیم ءَ انی ھم بے میاریں شھرمنند پہ زانت نشانگ کنگ بیتگ اَنت۔
جارکش ءَ گْوشتگ کہ گْوستگیں 79 سال ءَ دمگ ءِ تہ ءَ نا ایمنی ءِ بنیاد پاکستانی مھترھند ءِ شوندات اَنت، پاکستان پاشک ءُ چیراندری اندریں رنگے ءَ گیشواھیں ( توسیع پسندانہ ) واھگ دار ایت۔ پاکستان ءَ وتی جوڑ بیگ ءَ پد ھما سری روچاں بلوچستان زور گپت ، راجانی وتکواکی ءُ آجوئی پچ گرگ بیتگ اَنت ءُ آ بالادستیں پنجاپی رجیم ءَ وتی چیردست جوڑ کرتگ اَنت۔مروچیگیں ’ نام گپتیں پاکستان ‘ ءَ چیردستیں راج پہ وتی مانشت ءَ جھد ءَ اَنت۔جھان گندگ ءَ اِنت کہ پاکستان سیاسی ءُ چاگردی تک ءَ پرشت ءُ پروش ءِ آماچ اِنت ، ءُ ھمے جاور پاکستانی مھترھند ءِ جیڑھانی بن اَنت۔
آئی ءَ گْوشتگ سیاسی واکانی بگیری ءَ لشکر زوراکی ءُ مھترھندی ناشرکاری ءَ پد ھم پاکستان وتی کرد ءُ کارانی شر کنگ ءَ یکشل ءَ بے سوب بیتگ ، ءُ وتی اے بے سوبیاں ھمساھگیں ڈیھانی سر ءَ لڈگ ءُ دمگ ءَ بے تاھیری ءُ جنگی چاگردے ودی کنگ ءَ اِنت۔پاکستان ءِ لشکری توان ناں ایوک ءَ دمگ بلکیں چہ دمگ ءَ ڈن ءِ ڈیھاں ھم سھرائیں ترسے ۔ اے جاورانی دیمپانی ءَ المی اِنت کہ دمگ ءِ راجانی میان ءَ ھم سنتی بہ بیت ءُ وت ماں وت ھواریں سنگرے جوڑ بہ کن اَنت۔