جرمنی ءِ شھر بون ءِ مارکٹ-پلاٹس ءَ چہ بلوچ راجی زْرمبشت ( بی این ایم ) ءِ نیمگ ءَ زھرشانی کنگ ءُ آگاھی مھمے برجم دارگ بیتگ۔داں بلوچستان ءِ انیگیں ناگیگیں جاورانی نیمگ ءَ میان راج ءِ دلگوش پرینگ بہ بیت ءُ آ اود ءَ مردمی اگبالانی بگیری سھرا کنگ بہ بہ اَنت۔
زھرشانی کنوکاں گوں مھترھندی زوراکیانی آماچیں مردماں یکجھتی درشان کنان ءَ مزدانک ءِ لوٹ کرتگ۔ آیاں بلوچ یکجھتی کمیٹی ( بی وائی سی )ءِ سروکانی بگیری ءَ ’ فیس لیس ٹرائلز ‘ ءِ سر ءَ بے تاھیری درشانتگ ءُ گْوشتگ اے کار بنکی مردمی اگبال ءُ مزدانک ءِ سرجمیں راھبندانی چپگان اِنت۔
آیاں گْوشتگ کہ بلوچستان ءَ سرجمیں آئین ءُ راھبندی اگبال ماٹو اَنت ءُ پاکستانی لشکر وتی دل ئیگ ءَ کنگ ءَ اِنت۔ آ اود ءَ بی وائی سی ءِ نامی ئیں راھشون ڈاکٹر ماہ رنگ ءُ آئی ءِ ھمراھاں ناراھیں رنگے ءَ دزگیر کنگ ءَ پد آیاں انچیں مج ءُ کور دیمگیں آمیدگسے ءِ پارست ءَ سزا دیگ ءِ کوشست کنگ بیگ ءَ اِنت کہ ناں آمیدگس ءِ کارمند ، نے کہ گواہ ءُ نے کہ آمیدکار ءِ بارہ ءَ سرپدی ھست۔
بھر زیروکاں بلوچ سیاسی کارکن ءُ سیاسی راھشونانی لوگانی سر ءَ بیوکیں ارش ھم ایر جتگ اَنت ءُ گْوشتگ سیاسی کارکنانی لوگاں لٹ ءُ پل کنگ بیگ ءُ ڈرینگ بیگ ءَ اَنت۔ زور بیگواھیں مردمانی کھولانی سر ءَ زور دیگ بیگ ءَ اِنت کہ آ پریس کانفرنس بہ کن اَنت ءُ بہ گْوش اَنت کہ آیاں گوں وتی زور بیگواھیں کس ءُ مردماں کار نیست۔
۔
زھرشانی ءِ میان ءَ میان راج ءَ گْوشگ بیتگ کہ آ ماں بلوچستان ءَ مردمی اگبالانی لگتمالی ءِ پٹ ءُ پول کنگ ءَ میان راجی مردمی اگبالانی گل ، احوالکار ءُ پٹ ءُ پولکارانی بہ زیر ایت ءُ آزاتیں راست پولیں پترے جوڑ بہ کنت۔چہ ایشی ءَ ابید زھرشانی کنوکاں چہ یورپی سنت ءُ دگہ جھانی واکاں دزبندی کرتگ کہ آ گوں پاکستان ءَ وتی سفارتی ءُ گزرانکی سیادیانی ٹاھینگ ءَ مردمی اگبالانی اے ناگیگیں جاور ءُ اے رد ءَ بے تاھیریاں بھ ڈالچار مہ کن اَنت۔
آیاں گْوشتگ مردمی اگبالاں منگہ دیگ ءُ جست پرس کنگ چوناھیں ھم میان راجی سیادیانی ٹاھینگ ءِ بنیاد بہ بیت۔یورپی سنت ءِ ڈیھ گوں پاکستان ءَ وتی گزرانکی ، ربیدگی ءُ سیاسی سیادیاں ھمے نگاہ ءَ بہ چار اَنت ءُ پاکستان ءَ پابند بہ کن اَنت کہ آ مردمی اگبالانی پاسداری ءَ الم بہ کنت۔