جرمنی ءِ شھر ھینوور ءَ بلوچ راجی زْرمبشت ( بی این ایم ) ءِ چیردستی ءَ بلوچ شھمیرانی جھانی روچ ءِ درگت ءَ برجم دارگ بیتگیں نیاد ءَ تْران کنان سیاسی شرگدار ءُ نبشتہ کار عائشہ صدیقہ ءَ گْوشتگ کہ نی آئی ءَ پاکستانی مھترھند ءِ چک ءَ باور نہ کنت کہ آ وتی شھرمنندانی پانک ءَ جت کنت یا آیانی گلہ ءُ جیڑھانی آسر کنگ ءِ توان دار ایت۔
عائشہ صدیقہ ءَ اے گپ درشان بلوچ راجی زْرمبشت ( بی این ایم ) ءِ چیردستی ءَ جرمنی ءِ شھر ھینوور ءَ برجم دارگ بیتگیں بلوچ شھمیرانی جھانی روچ ءِ نیاد ءَ تْران کنان ءَ درشانتگ۔ آئی ءَ گْوشتگ کہ آئی ءَ گپڑے سال اِنت کہ مدام گوں بلوچاں ھم دردی درشان کنگ ءَ اے نیاداں بھر زیر اِنت ، بلے اے اداریگ ءَ آ وتی جندءِ زبھری ءُ دردناکیں مارشتاں ھم اے نیاد ءَ درشانگ لوٹ ایت۔
آئی ءَ گْوشتگ کہ کسے ءِ کس ءُ مردمانی زور بیگواہ کنگ انچیں کردے کہ آئی ءِ ھچ نیمونے پیش کنگ نہ بیت۔
عائشہ صدیقہ ءَ گْوستگیں باریگانی بن شون ءَ گْوشتگ کہ 2012 ءَ بہ گر داں 2014 ءِ میان ءَ آئی ءَ اسلام آباد ءَ زور بیگواھیں مردمانی کھولانی زھرشانی یے ءَ بھر زرتگ اَت۔ ھما وھد ءَ ماما قدیر ءِ سروکی ءَ زور بیگواھیں مردمانی کھول چہ شال ءَ داں اسلام آباد ءَ پادانی روانک کنان ءَ اتکگ اَت اَنت۔ آئی ءِ گْوشگ اَت کہ ھما وھد ءَ زھرشانی ءَ بھر زیرگ ءِ مول پاکستان ءِ وتی دیمپانی ھم کنگ اَت ، پرچا کہ اگاں آ گوں اے روانک ءِ بھر زیروکاں مہ اوشتاتین اَنت گڑا پہ آیاں چوشیں جاھے نہ منتگ اَت کہ بلوچاں بہ گْوش اَنت گوں پاکستان ءَ ھوار بہ بہ اَنت۔
بلے ، چہ دھکے ءَ گیش زمان ءِ گْوزگ ءَ پد آئی ءِ زانگ ءُ سما ءِ تہ ءَ اے بنکی مٹی اتکگ۔ آئی ءَ جست کرتگ : ’’ ما باریں چی ءِ دیمپانی کنگ ءَ ایں ؟ ‘‘ آئی ءِ رد ءَ مھترھندی زوراکی ءُ زورشاھیں واکداری ءَ یکشل گیش بیتگ ءُ نی آئی ءِ مھترھند ءِ سر ءَ باور نہ منتگ۔
پاکستانی مھترھندی تْرام ءِ سر ءَ ایراد گران ءَ عائشہ صدیقہ ءَ اے مھترھند نوک آبادی ءُ مڈیانی لٹ ءُ پل کنوک گْوشتگ۔ آئی ءَ گْوشتگ پاکستان چہ بندات ءَ راستیں سیاسی مھترھندے ءِ جاہ ءَ نوکرشاھی تْرامے ( بیوروکریسی ) ءِ وڑ ءَ جوڑ بیتگ۔ آئی ءَ گْوشتگ کہ لشکر ءِ سیاست ءَ کرد نی ادارکی دزمانجنی یے نہ اِنت بلکیں مروچیگیں تْرام نی راستی ءَ ’’ آئینی لشکری بالادستی ‘‘ ءِ دْروشم ءَ اتکگ ۔
آئی ءَ سیاسی گل ءُ پارلیمان ءِ سر ءَ ھم سکا ایراد گپتگ ءُ گْوشتگ کہ راستین ءَ اگاں بہ لوٹ ئے آ چہ وتی وت واکی ءَ دستکش بیتگ اَنت۔ آئی ءِ رد ءَ پارلیمان ءَ چہ لشکر ءِ لوٹاں رسانک ءِ سر ءَ پابندی جتگ ءُ دگہ گام گیج من اتگ۔ آئی ءَ گْوشتگ کہ آمیدگس ، مردمی ءُ دگہ مھترھندی تْرامگیج نزور بیتگ اَنت ، ءُ لشکری ءُ ٹوھیں واکدارانی سیتانی سر ءَ جوڑ بیتگیں ھم دستی ڈیھ ءِ مڈیانی بھر کنگ ءَ پرواک بیتگ۔
عائشہ صدیقہ ءَ زور بیگواھی ، ترس ءُ مھترھندی زوراکی گوں مڈیانی زورگری ءُ چہ آیانی چہ سیت زرگ ءِ تْرام ءَ ھم گْرنچ کنان ءَ گْوشتگ کہ مھترھند بلوچستان، پشتونخوا ءُ دگہ دمگانی زمین چیری مڈیاں ابید چہ مردمانی جست ءَ بھا کنگ ءَ ساڑی اِنت۔ آئی ءِ رد ءَ پہ ھمے کار ءِ کنگ ءَ زور ءُ زوراکی ءُ مردمانی توار ءِ نگٹ کنگ جنگی ابزارے ءِ پیم ءَ کارمرد بیگ ءَ اِنت داں مڈیاں دستیگ کنوکیں واکانی سیتانی پانک جنگ بہ بیت۔
آئی ءَ انیگیں روچاں اسلام آباد ءَ بیتگیں نیادے ءِ بارہ ءَ گپ جتگ کہ آئی ءِ تہ ءَ فیلڈ مارشل عاصم منیر ءَ ھم بھر زرتگ ، آئی ءَ گْوشتگ کہ آ اود ءَ زمین چیری مڈیانی بارہ ءَ کارشور ءُ پیش نھادانی سر ءَ ناں پارلیمان پت ءَ زیرگ بیتگ ءُ نے کہ گوں ھما دمگانی مردماں سوج کنگ بیتگ کہ آیانی مڈیانی بارہ ءَ کارشور اش کرتگ۔
عائشہ صدیقہ ءَ زور بیگواھی ءِ بگیری ءَ جھد کنوکیں بلوچ مات گوں ارجنٹائن ءِ نامداریں ’’ پلازا دے مایو ءِ مات ‘‘ ءَ ھم درور لیک اتگ اَنت ءُ گْوشتگ دوئیں دمگانی مات وتی زور بیگواھیں کسانی بارہ ءَ سرپدی ءَ زبھر کنگ بیتگ اَنت ، آیانی سر ءَ بھتام جنگ بیتگ ءُ بیھار دیگ بیتگ ءُ آیانی دزبندی دلگوش دیگ نہ بیتگ اَنت۔
آئی ءَ ارجنٹائن ءِ ھما ماتانی جھد ءِ سر ءَ نبشتہ بیتگیں کتابے ءِ نام گپت ءُ وتی تْران ءِ گڈی ءَ بلوچ جنینانی زْرمبشت ساڑات، کہ مھترھندی زور ءُ ترسانی تہ ءَ ھم آیاں وتی زور بیگواھیں کسانی پد جنگ ءُ مزدانک ءِ جھد ءَ یکشل ءَ برجاہ داشتگ۔
