Skip to content

ھسپانی تاکار کارلوس زوروتوزا ءَ ماں بی این ایم ءِ نیاد ءَ بلوچستان ءِ سر ءَ رسانکی بندش ءُ تاکاری ءِ جیڑہ سھرا کرتگ اَنت

آئی ءَ گْوشتگ کہ ھم کارایں تاکارانی شون کارانی سر ءَ زور کنگ ، آیانی کھولاں تچکے ءَ بیھار دیگ بیت ءُ سیلف سینسر شپ ءِ دیمپان اَنت۔

بلوچستان ءِ سر ءَ تاکاری کنوکیں ھسپانی تاکار کارلوس زوروتوزا ءَ جرمنی ءَ بیتگیں نیادے ءَ تْران کنان ءَ گْوشتگ کہ اے دمگ وتی تبریتی ارزشت ءُ دمگ ءَ تاکارانی ترس ءِ دیمپان بیگ ءَ پد ھم ، ماں جھانی رسانک ءَ شریں وڑے ءَ گندگ نہ بیت۔

کارلوس زوروتوزا ءَ ماں ھینوور ءَ بلوچ راجی زْرمبشت ( بی این ایم ) ءِ چیردستی ءَ برجم دارگ بیتگیں شھمیرانی روچ ءِ نیاد ءَ تْران کنان ءَ گْوشتگ کہ آ نی بلوچستان ءَ شت نہ کنت ءُ ماں اسپین ءَ ھم گوں بلوچاں گند ءُ نند گدارے بیت۔ آئی ءِ گْوشگ اَت کہ آئی ءِ مول ٹیلی فونی گپ ءُ تْران ءُ گوں نند ءُ نیاداں اے دمگ ءِ حالانی شنگ کاری برجاہ داران ءُ اے گپ ءَ پدر کنگ اِنت کہ اے دمگ ءَ رسانک ءَ اے پیم کم دلگوش پرچا رس اتگ۔

آئی ءَ گْوشتگ کہ بلوچستان پاکستان ، ایران ءُ افغانستان ءِ سیمسران اِنت — ھمے دمگ کہ طالبان ، القاعدہ ءُ دگہ گلانی کارپدانی برپشت ءَ مدام تاکان اَنت — بلے بلوچ کہ آئی ءِ رد ءَ ھمے گلانی سرجمیں نشانگ اَت ، ماں جھان ءَ گیش تر ناپجار اَنت۔

زوروتوزا ءَ گْوشتگ کہ ڈنی تاکارانی دیم ءَ مزنیں اڑاند ودی کنگ بیتگ۔ آئی ءَ نیویارک ٹائمز ءِ تاکار ءِ کیسانی بارہ ءَ گپ جت کہ آیانی تہ ءَ کارلوٹا گال ھم گون اِنت ، آئی ءِ گْوشگ اَت 2006 ءَ آ لٹ دیگ ءُ چہ ڈیھ ءَ در کنگ بیتگ ، ءُ دگہ تاکارے ءَ سرگوستے نبشتگ ءُ چہ ڈیھ ءَ گلینگ بیتگ۔ آئی ءَ گْوشتگ اگاں آ گوں ایمنی پد ءَ شت ھم بہ کنت آ پہ روگ ءَ دل ءَ پر کر نہ کنت پرچا کہ آ بلوچی ، اردو یا فارسی نہ زانت پمیشکا آ پہ وتی کاراں ھندی رجانکارانی کمک ءِ وازمندگ بیت ، کہ پد ءَ ترسینگ بہ اَنت یا چہ ایشی ءَ بدتریں جاورے ءِ دیمپان۔

آئی ءَ دمگی تاکارانی جیڑھانی بارہ ءَ گپ جنان بانک کریمہ ءِ ھم نام گپت ، کہ ماں درایڈھی جاوراں ماں کینیڈا ءَ کشگ بیتگ ، ءُ بلوچ تاکارے کہ آئی ءِ کنٹ ماں سویڈن ءَ دست کپتگ۔ آئی ءَ گْوشتگ کہ ھم کارایں تاکارانی شون کارانی سر ءَ زور کنگ ، آیانی کھولاں تچکے ءَ بیھار دیگ بیت ءُ سیلف سینسر شپ ءِ دیمپان اَنت۔ تاکار ابید سیمسر ءِ بن شون ءَ آئی ءَ گْوشتگ کہ پاکستان جھانی تاکاری آجوئی ءِ لڑ ءَ 153مین نمبر ءَ اِنت ءُ بلوچستان ءَ سنسرشپ نوکرشاھی ءِ دست ءَ اِنے ، اے جاورانی تہ ءَ تاکاراں لشکری کارمندانی ءِ سر ءَ تاکاری کنگ ءَ پیش موکل گرگی اِنت۔ فریڈم نیٹ ورک ءِ رد ءَ آئی ءَ گْوشتگ کہ گْوستگیں دو دھکاں ءَ بلوچستان ءَ کم ءَ کم 40 تاکار کشگ بیتگ۔

زوروتوزا ءَ ماہ رنگ ءِ ھم نام گپت ، کہ آئی ءِ رد ءَ چہ دزگیری ءَ پیسر گوں آئی ءَ راھوت ءَ اَنت ءُ نوبل ایمنی داد ءِ نام گپت ءِ پد ھم دزگیر اِنت۔

آئی ءَ گْوشتگ کہ گوں راجانی سنت ءَ دزبندی کنگ ءِ جاہ ءَ ، تاکاری پھانات ءَ مادنیں گام گیج ایش اِنت کہ دمگی تاکار پھریزیں رنگے ءَ راھوت کاری ھیل دیگ بہ بہ اَنت ءُ انچیں دست پہ دستیں راھوت کاری ءُ ھم کاری ٹاھینگ بہ بہ اَنت آیانی گپ ھما شونکاراں بہ رس اَنت کہ بلوچ جیڑہ ءِ ارزشت ءَ سرپد اَنت۔ آئی ءِ گْوشگ اَت کہ آئی ءَ لیبیا ، عراق ءُ ناگورنو کاراباخ ءِ پجیگ ءَ دگہ جنگی دمگاں ھمے وڑیں رسانکی ھیلکاری ءِ سر ءَ کار کرتگ۔

thebnm.org/bal/bnmgermany-bal/31883/