ماں جرمنی ءَ بابا خیربخش مری ءِ دوازدھمی سالروچ ءَ بی این ایم ءِ مراگش

مائنز ، جرمنی — بلوچ راجی زْرمبشت ( بی این ایم ) ءِ چیردستی ءَ شمبے ءِ روچ ءَ نامی ئیں راجدوستیں راھشون بابا خیربخش مری ءِ دوازدھمی سالروچ ءِ درگت ءَ مراگشے ایر کنگ بوت۔ بی این ایم جرمنی تک ءِ نارتھ رائن ویسٹ فیلیا ( این آر ڈبلیو ) بنزہ ءِ نیمگ ءَ بیتگیں اے مراگش ءَ بابا مری ءِ زند ، جھد ءُ پہ بلوچ راجی زْرمبشت ءَ آئی ءِ کار ءُ کردانی سر ءَ آ ساڑایگ بوت۔ مراگش ءِ بندات پہ بلوچ شھمیرانی یات ءَ چہ دو دم ءِبے تواری ءُ بلوچ راجی سوت ءَ بوت ۔ مراگش ءِ جارچین این آر ڈبلیو بنزہ ءِ کمک کارگشاد حبیب اَت ، آئی ءَ بابا مری راجدوستی ءِ چیدگ لیک اِت ءُ گوں آئی ءِ لیکھی راھشونی ءُ راجی لوٹ ءَ پدنہ کنزیں رنگے ءَ ھمراھداری ءِ ارزشت ءِ سر ءَ گپ جت۔

مراگش ءِ گچینی مھمان ءُ بی این ایم جرمنی تک ءِ کارگشاد لقمان ءَ گْوشت کہ بابا خیربخش مری ءَ انیگیں زمانگ ءِ گھگیری زْرمبشت ءِ تچک ءُ راستیں بنیاد ایر کرت اَنت۔ آئی ء گچینی بابا مری ءِ آگاھی پتر ’ حق توار ‘ ءِ نام گپت ءُ انیگیں زمانگ ءِ زْرمبشت ءِ تک ءُ پھناتانی گیشینگ ءَ حق توار چیدگے لیک اِت۔

آئی ءَ چد ءُ دیم گْوشت کہ بابا ءَ ایوک ءَ سیاسی گپ ءِ ناں بلکیں گامگیجی ءُ تْرام اتگیں جھد ءِ سر ءَ باور داشتگ اَت۔ اے رد ءَ آئی ءِ گلگدارے ءِ درور ئِے دات کہ گلگدار ءِ مھمانجل ءَ پہ زْرمبشت ءِ نازرک ءُ تھی جیڑھانی سر ءَ گپ جنگ ءَ وھدے بابا مری ءِ ٹوھینگ ءِ کوشت کرت ، گڑا بابا مری ءَ گوں زانتکاری ءُ دیرچاری ءَ پسو دات : ’’ من الم ءَ سرپد آں ، بلے چاریگے نہ آں ۔‘‘

لقمان ءَ وتی گپانی گڈی ءَ گْوشت اے رنگیں پھتوئیں راھبند پہ راجی جھدکاراں مزنیں کیامے ءِ بستار ءَ اَنت۔ آئی ءَ زور دات کہ ما راجی زْرمبشت ءِ بن ءُ بنیادانی شریں وڑے ءَ سرپد بیگ ءَ بابا مری ءِ شھزانتی ، زند ءُ جھد ءَ ھیرتی ءَ بہ وان این ءُ پٹ ءُ پول بہ کن ایں۔

بی آر پی جرمنی ءِ باسک حماد ءَ بابا مری انچیں لیکھی راھشونے لیک اِت کہ آئی ءِ دید مروچیگیں نوکیں جھد ءَ توانمند کنگ ءَ اِنت ، ھمے پیم بی این ایم ءِ باسک شیرجان ءَ گْوشت آئی ءِ سرجمیں زند ءِ دیمونی پہ آیوکیں پدریچ ءَ درور اَنت۔

بابا خیربخش مری ءِ جتائیں سیاسی بستار ءُ کردار ءِ سر ءَ گپ جنان بی این ایم ءِ کلانھیں باسک شئے جامی ءَ گْوشت آ چوناھیا ٹکے ءِ سردار اَت بلے آئی ءَ چہ ٹکی سیتاں بلوچ ءِ شاھگانیں سیت مدام دیم تر بیتگ اَنت — شئے جامی ءَ مراگش ءِ تہ ءَ وتی گھگیری لچھے ونت ءُ بابا مری ءِ دید ، کرد ءُ کار ساڑات اَنت۔