بی وائی سی ءِ راھشون ڈاکٹر ماہ رنگ ءُ صبغت اللہ ءِ زند بندیگی ، بی ایس او ءِ سرکماش بالاچ قادر ، دگہ نودربر راھشون ءُ سیاسی کارکنانی بگیری ءَ بے بنیں آمیدگسی کارروائیانی بگیری ءَ جرمنی ءِ شھر ھنور ءَ چہ بلوچ راجی زْرمبشت ( بی این ایم ) نیمگ ءَ زھرشانی یے بیتگ۔
گوں زھرشانی ءَ بی این ایم جرمنی تک ءِ کماش اصغر ، پیسرگیں کماش شرحسن ، بی این ایم جرمنی ءِ پیسرگیں کمک کماش صفیہ ، بی آر پی ءِ باسک حماد کرد ، پی ٹی ایم ءِ فیصل خان ، بی این ایم ءِ باسک اکبر علی ، سارہ عمیر ، بی این ایم ءِ دوزواہ حرابانو ءُ مراد بلوچ ءَ گپ جتگ۔
گوں زھرشانی کنوکاں گپ جنان تْرانکاراں گْوشتگ چہ 1948 ءَ زورگپتیں بلوچستان ءِ گرگ ءَ پد پاکستان ءِ زوراکیانی دْرچ یکشل ءَ برجاہ اِنت۔گْور اے زوراکیاں بلوچ راج نگٹ کنگ نہ بیت۔بلوچستان چہ جھان ءَ سندگ ءُ چہ مزدانک ءَ زبھر کنگ بیتگ ۔
گْوشتانک دیوکاں گْوشتگ چہ پاکستانی مھترھند ءِ نیمگ ءَ بلوچ راج چہ ھمک در ءُ راھاں زبھر کنگ بیگ ءَ اِنت ءُ گوں بازیں کارستانی پلہ مرزی ءَ ماں بلوچستان ءَ سیاسی سرگرمیانی جاہ یکشل ءَ نز آرگ بیگ ءَ اِنت۔
آیاں اے گپ ءِ نیمگ ءَ دلگوش پرینتگ کہ جست ءُ پرس ءُ مردمی اگبالانی لوٹ ءِ سر ءَ بی وائی سی ءِ سروک ءُ باسکانی زندانی کنگ میان راجی مردمی اگبال ءِ کْیامانی سھرائیں بگیری اِنت۔ آیاں چہ میان راج ءَ لوٹ کرتگ کہ آ اے جاور ءَ دلگوش بہ کن اَنت ءُ پہ ایشی ءِ گیش ءُ گیوار ءَ ناپتیں کردے پیلو بہ کن اَنت۔