بلوچستان ءَ پاکستانی لشکر دست ءُ گوشیں مردماں نشانگ کنگ ءَ اِنت ءُ میان راجی بے تواری بلوچستان ءَ مردمی اگبالانی جاور ءَ ھمک تک ءَ بدتر کنگ ءَ اِنت۔ایوک ءَ ھمے ھپتگ ءَ 17 کس در آمیدگسیی کشگ بیتگ۔بلوچستان ءِ ھنکین مستونگ ، نوشکے ، زھری ، خضدار ، کیچ ءُ گوادر ءِ کش ءُ کر ءِ ھلک ءُ میتگاں ھم روچ زور بیگواھیانی دْرچ برجاہ اِنت ءُ شھر ءُ بازارانی سر ءَ گوں جنگی بالگرداں بمب ءُ تیر گواری بیگ ءَ اِنت۔بی این ایم مھترھندی ناشرکاری ءَ گوں ترندی ءَ ایر جنت۔ پاکستان بلوچ راج ءَ چکچین کنگ ءَ اَنت ابید چہ میان راجی دزمانجنی ءَ اے جیڑہ ءِ گیشینگ ءِ دگہ راھے نیست۔اے گپ بلوچ راجی زْرمبشت ( بی این ایم ) ءِ جارکش ءَ بلوچستان ءَ انیگیں روچاں مھترھندی ناشرکاری ءِ کارپدانی پژدر ءَ ماں وتی درشانے ءَ گْوشتگ اَنت۔
جارکش ءَ اے رد ءَ گْوشتگ زورگپتیں بلوچستان پاکستانی لشکر ءِ یکشلیں زوراکی ءُ مھترھندی ناشرکاری ءِ آماچ اِنت۔دو جون 2026 سئے شمبے ءِ روچ ءَ پاکستانی لشکر ءَ یک رندے پد ءَ زھری نشانگ کرت۔اے ارش ءَ ماں زھری ءَ پاکستانی لشکر پرایمنیں سیاسی کارکن خلیل احمد موسیانی ءِ لوگ ءَ پتر اِت ، آ تیر جت ءُ ٹپی ئیں جاوراں دزگیر کنگ ءَ پد دزگیری جاہ ءَ کشت ءُ دگہ بازیں مردم زور بیگواہ کرت اَنت۔زور بیگواھیں مردمانی تہ ءَ زھری خان موسیانی ، شکر خان ، ثناء اللہ موسیانی ، امید علی خان ، دوست محمد ، ارشاد احمد ءُ دگہ ھوار اَنت ، کہ دنیگت یلہ کنگ نہ بیتگ اَنت۔
آئی ءَ پاکستانی لشکر ءِ دگہ کارپدانی بارہ ءَ گْوشتگ ، 31 مئی ءَ کردگاپ ، مستونگ ءَ پاکستانی لشکر ءَ ٹوپ گواری کرت ءُ غلام جان سمالانی کشت کہ ڈرائیورے اَت۔یک جون ءَ کڈکوچہ ءِ دمگ کڈعمرانی ءَ میتگ ءِ سر ءَ گوں جنگی بالگرداں تیرگواری کنگ بوت ، راھوت سستگ اَنت پمیشکا دنیگت اے بیڑ ءِ تاوان زانگ نہ بیتگ اَنت۔
بی این ایم ءِ جارکش ءَ گْوشتگ زورگپتیں بلوچستان چہ 1948 ءَ زورگری ءِ سری روچ ءَ بہ گر داں انی یکشل ءَ پاکستانی لشکر ءِ زوراکیانی آماچ اِنت۔اد ءَ سیاسی واکانی پہ زور لگتمال کنگ ءِ شوندات گوں ترندی ءَ برجاہ اِنت۔زور بیگواھیانی دْرچ ءَ ھزارھاں کھول گزرانکی ءُ چاگردی تک ءَ تباہ کرتگ۔31 مئی ءَ بہ گر داں 2 جون ءَ ایوک ءَ سئے روچ ءِ تہ ءَ پاکستانی لشکر ءَ 17 مردم کشتگ ءُ اے گپ پہ جار من اتگ بلے دنیگت پاکستانی لشکر اے مردمانی ناماں گْوشگ ءَ نہ اِنت۔ اے رنگیں ویلانی تہ ءَ گیش تر زور بیگواھیں مردم دزگیری جاہ ءَ کشگ بی اَنت ءُ پاکستانی لشکر دروگ بند ایت کہ اے مردم سلاھبند بیتگ ءُ دیم پہ دیمی میڑ ءَ جنگ بیتگ اَنت۔کشگ بیتگیں مردمانی کنٹ ھم کھولاں دیگ نہ بی اَنت۔
جارکش ءَ گْوشتگ پاکستانی لشکر بلوچ راج ءَ چکچین کنگ ءِ شوندات ءِ سر ءَ کار ءَ اِنت۔اے انچیں یکشلیں کارے کہ چہ ایشی ءَ راجے سیاسی ، ربیدگی ، چاگردی ءُ گزرانکی تک ءَ تباہ کنگ بیت۔ڈیرہ بگٹی ، کوھلو ، آواران ، زھری ، خضدار ، پنجگور ، کیچ ءُ گوادر ءِ ھنکیناں دھاں ھلک ءُ میتگ تباہ کنگ ءُ مردم پہ زور لڈ ءُ بار ءَ ناچار کرتگ اَنت۔ھمے شوندات ءِ دْرچ ءَ انیگیں روچاں گوادر ھنکین ءِ ھند جیمڑی ءِ میتگ ’ پانوان ‘ یکشل ءَ نشانگ کنگ بیگ ءَ اِنت۔
آئی ءَ گْوشتگ پاکستانی لشکری شپ ءِ تھاروکی ءَ پانوان ءَ لوگانی سر ءَ بیڑ کار اَنت۔ چہ زور بیگواھی ، لوگانی پروشگ ءُ درآمیدگسی کوشاں شزار بیتگیں دھاں کھولانی سداں مردم لڈ اتگ ءُ روکپتی بلوچستان ءَ شتگ ، آ اود ءَ آ گزرانکی ءُ چاگردی جیڑھانی دیمپان اَنت ءُ دھاں چک چہ وانگ ءَ زبھر اَنت۔
جارکش ءَ گڈی ءَ گْوشتگ بی این ایم گوں وتی سرجمیں وس ءُ واک ءَ بلوچستان ءِ آجوئی ءِ راستی ءَ جھان ءِ دیم ءَ آرگ ءَ سرگرم اِنت ءُ چہ میان راج ءَ لوٹ کنت کہ بلوچستان ءَ جنگ آماچیں دمگے بہ من ایت ءُ زیت دزمانجنی بہ کنت۔ابید بلوچستان ءِ آجوئی ءَ ناں ایوک ءَ بلوچ راج ءِ مانشت ترس ءِ دیمپان اِنت بلکیں تبریتی ( اسٹرٹیجک ) بنیاد ءَ اے پرازرشتیں دمگ ءَ ایمنی ھم گوں بلوچ راج ءِ وتواکی ءِ اگبال ءُ بلوچستان ءِ آجوئی ءَ بندوک اِنت۔