بلوچ راجی زْرمبشت ( بی این ایم ) ءِ جارکش ءَ جار جتگ کہ 28 جون ءَ ڈاکٹر دین محمد ءِ زور بیگواھی ءَ 17 سال سرجم بیت ، اے دم ءُ درگت ءَ سرجمیں تک ءُ ھنکین بلوچستان ءِ پجیگ ءَ سرجمیں جھان ءَ مراگش برجم دار اَنت۔ اے مراگشانی تہ ءَ مردماں سرپدی دیگ ، پنتاک بھر کنگ ، زھرشانی کنگ ، سسا تْرانی نیاد ءُ راجانی سنت ءِ پجیگ ءَ دگہ مردمی اگبالانی تْرامگیجاں نمدی نبیسگ ھوار اَنت۔
جارکش ءَ گْوشتگ گل ءِ بنجاھی سروک ، نامی ئیں ڈاکٹر ءُ راجدوست ڈاکٹر دین محمد 28 جون 2009 ءَ پاکستانی لشکر ءَ ماں ھسپتال ءِ تہ ءَ چہ آئی ءِ وابجاہ ءَ دزگیری ءَ پد زور بیگواہ کرت۔آئی ءِ زور بیگواھی ءِ 17 سال سرجم بیگ ءِ درگت ءَ گل آئی ءَ ’ آجوئی ءِ بندیگ ‘ ءِ دادنام ءَ دنت۔اے درگت ءَ آئی ءِ سسا ءُ سیاسی کرد ءِ سھرا کنگ ءَ میان راجی تک ءَ گچینی مراگش برجم دارگ بیت۔
جارکش ءِ رد ءَ ، ڈاکٹر دین محمد ءِ زور بیگواھی بلوچ راجی زْرمبشت ( بی این ایم ) ءِ بگیری ءَ مھترھندی بیڑ ءُ مردمی اگبالانی مزنیں بگیریانی سھرائیں چیدگ اِنت۔ آئی ءِ بیگواھی ھما ھزاراں بلوچ پسگانی جھگیری کنت کہ چہ گْوستگیں دو دھکاں زور بیگواھی ءِ آماچ اَنت ءُ آیانی کھول روچ ء مروچی مزدانک ءِ وداریگ اَنت۔
درشان ءَ گْوشگ بیتگ کہ اے مراگشانی مول ڈاکٹر دین محمد ءِ پجیگ ءَ درسیں زور بیگواھیں مردمانی کیساں میان راجی تک ءَ سھرا کنگ ءُ بلوچستان ءَ برجاھیں مردمی اگبالانی بدتریں جاور ءِ نیمگ ءَ میان راج ءِ دلگوش پرینگ اِنت۔