کیمبرج زانشتجاہ ءِ پولکارے ءَ ماں جرمنی ءَ نیادے ءَ تْران کنان ءَ گْوشتگ کہ پاکستان ءِ چہ نوک آبادی ءَ پد ءِٰ مھترھند بلوچستان ءِ سر ءَ انگت نوک آبادی زمانگ ءِ رپک ءُ راھاں کار بندگ ءَ اِنت ، ءُ آئی ءَ اے جاور ’’ تھی نوک آبادی ‘‘ ءِ دْروشمے گْوشتگ۔
رفیع اللہ کاکڑ ، کہ دیمروئی ءُ جیڑہ ءِ سیاسی گزرانک ءَ پی ایچ ڈی ءِ نودربرے ءُ ڈان ءَ نبشتہ کارے ، آئی ءَ ھینوور ءَ بلوچ راجی زْرمبشت ( بی این ایم ) ءِ چیردستی ءَ بلوچ شھمیران روچ ءِ نیاد ءَ زوم ءِ پارست ءَ گپ جتگ۔ آئی ءَ 19می سدھک ءَ میر محراب خان ءِ برتانیا ءِ لشکر ءِ بگیری ءَ گھگیری ءِ سر ءَ گپ جت ، بلے آئی ءِ بنگپ چہ آجوئی ءَ پد نوک آبادی وڑ ءُ ڈولانی برجاہ دارگ اَت۔
کاکڑ ءَ گْوشت کہ مھترھند ءِ گوں بلوچستان ءَ روشت سئے کتگانی سر ءَ اوشتاگ : انچیں نمائشی سروک ءُ مسترانی کارمرد کہ بومیانی برپشت ءَ واک دار مہ بہ اَنت بلکیں اسلام آباد ءِ وازمندگ بہ بہ اَنت ؛ یک گزرانکی ڈولے کہ بلوچستان ایوک ءَ آمگیں نکان ءُ مڈیانی درپ ءُ چیزے ءِ سر کنگ ءِ راہ لیکگ بیت ءُ بلوچستان ءَ نندوکیں مردماں ایشانی کم تریں سیت رس اَنت ؛ ءُ پانکی شوندات ( سیکیورٹی پالیسی ) کہ سیاسی بئے ءُ ڈکانی جاہ ءَ زوراکی ءِ سر ءَ برجاہ بہ بیت۔
آئی ءِ گْوشگ اَت کہ مھترھند ءَ دیر اِنت توپکی چیرکانی برپشت ءَ وت ءَ داشتگ ، ڈنی شونداتے بہ بیت یا راج دوستیں زْرمبشتانی بگری ءَ کارے ۔ اگاں کہ واک دار گْوش اَنت کہ آیاں ’ شر ءُ ھرابیں طالبانانی ‘‘ پیر کنگ یلہ داتگ ، آئی ءَ گْوشتگ کہ اے کار گوں سلاھبندیں رمبانی پلہ مرزی پد ءَ بن گیج کنگ بیتگ ، کہ ناشرکاری ءِ بگیری ءِ کارروائیاں کارمرد بیگ ءَ اِنت۔ آئی ءَ اے ھم گْوشتگ کہ بلوچستان ءِ لھتیں سیاسی ءُ ٹکی راھشونانی سر ءَ زور دیگ بیگ0 ءَ اِنت کہ آ وتی ٹکی لشکر جوڑ بہ کن اَنت ، کہ آئی ءَ مھترھند ءِ زوراکی ءِ سر ءَ واک ءِ ترسناکیں رنگے ءَ یلہ کنگ لیک اِت۔
انیگیں جاورانی سر ءَ کاکڑ ءَ گْوشتگ سیاسی ناپتی ءِ درشان میارے لیکگ بیگ ءَ اِنت ، گپ ءُ تْران ءُ سیاسی سرگرمیانی سر ءَ سکیں بندش اَنت ءُ روزگار سان مند بیگ ءَ اَنت۔ آئی ءَ اے وڑ ءُ پیم نوک آبادی زمانگ ءِ رپک ءُ راہ گْوشت اَنت : الباریں ملام ، لوگ ءُ ڈگارانی پروشگ ءُ ءُ نام گپتیں پراریانی کھولانی دزگیری۔ آئی ءِ گْوشگ اَت کہ نوکیں مھترھند ءَ اے رنگیں کرد ءُ کارانی ھچ جاہ نیست۔
بلوچی: آئی ءَ آسر ءَ گْوشتگ کہ اگاں بلوچستان ءَ پہ راہ ءُ راھبندی منگ بیتگیں نوک آبادی آسر بیتگ ، تھی نوک آبادی سیاسی جھگیری ، مڈیانی واھندی ءُ بومیانی مڑاہ ءِ رنگیں گیشگ نہ بیتگیں جیڑھانی وڑ ءَ برجاہ اَنت۔ آئی ءِ رد ءَ مھترھند اے جیڑھانی دیم پہ دیمی انگت گوں نوک آبادی رپک ءُ راھاں کنگ ءَ اِنت۔
